Sextán ára unglingalandsliðsmaður frá Akranesi semur við FCK

Skagamaðurinn Hákon Arnar Haraldsson er farinn til danska félagsins FC Kaupmannahafnar en þetta er staðfest á heimasíðu félagsins í dag.

Hákon Arnar Haraldsson er enn bara sextán ára en hefur leikið ellefu leiki fyrir yngri landslið Íslands og skorað í þeim fjögur mörk.

Den 16-årige islandske offensivspiller Hákon Arnar Haraldsson fra @ia_akranes bliver en del af F.C. Københavns talentafdeling i den kommende sæson #fcklivehttps://t.co/ivuD5t9oAhpic.twitter.com/rV3OKwOLZb

— F.C. København (@FCKobenhavn) June 27, 2019

Hákon Arnar, sem er fæddur árið 2003, hefur ekki fengið tækifæri með ÍA í Pepsi Max deildinni og bætist þar með í hóp þeirra stráka sem fara út án þess að spila í efstu deild á Íslandi.

Hann var í íslenska sautján ára landsliðinu sem tók þátt í úrslitakeppni EM í Írlandi í maí og spilaði þá í leikjunum á móti Rússlandi og Ungverjalandi.

Foreldrar Hákon Arnars náðu miklum árangri í fótboltanum og voru þau bæði margfaldir Íslandsmeistarar og landsliðsfólk. Það eru þau Haraldur Ingólfsson og Jónína Víglundsdóttir.

Eldri bróðir hans, Tryggvi Hrafn Haraldsson, reyndi fyrir sér í atvinnumennsku í Svíþjóð en spilar með ÍA liðinu í Pepsi Max deild karla í sumar.

Líkt og Tryggvi Hrafn þá spilar Hákon Arnar framarlega á vellinum.