Vatíkanið afnemur friðhelgi sendiherra að beiðni franskra yfirvalda

Vatíkanið hefur ákveðið að verða við bón franskra stjórnvalda og svipta erindreka sinn í París friðhelgi sinni en sá er grunaður um kynferðisbrot. lCNN greinir frá.

Hinn 74 ára gamli Luigi Ventura hefur verið ákærður fyrir að hafa snert starfsmann ráðhúss Parísarborgar á óviðeigandi hátt við nýársmóttöku borgarstjóra Parísar í janúar siðastliðnum.

Frönsk stjórnvöld höfðu óskað eftir því að friðhelgi yfir honum yrði afnumin og hafa stjórnvöld í Páfagarði nú orðið að þeirri ósk.

Í yfirlýsingu frá Vatíkaninu segir að ákvörðunin, sem sögð er óvenjuleg, sé í samræmi við vilja Ventura sem hefur lýst yfir fullum samstarfsvilja með yfirvöldum við rannsókn málsins

Ákvörðun sem þessi er fátíð en í flestum sambærilegum málum kýs Vatíkanið heldur að kalla sendiherra sína til baka og rétta yfir þeim í Páfagarði.

Til að mynda hafnaði Vatíkanið bón Bandarískra stjórnvalda um að friðhelgi yfir Carlo Capella sem ákærður var fyrir kynferðisbrot árið 2018 væri afnumin. Þess í stað var hann kallaður til baka, réttað yfir honum í Páfagarði og hann þar dæmdur til fimm ára fangelsis.

En nú er annað uppi á teningunum og Því er ljóst að Ventura fer fyrir rétt í Parísarborg