Davíð uppnefnir Þorgerði kóngsdóttur í Klofningi

Davíð Oddsson ritstjóri Morgunblaðsins er í miklu stuði í sínum nýjasta leiðara sem birtist í morgun og uppnefnir fólk og fyrirbæri vinstri hægri.

„Þor­gerður kóngs­dótt­ir í Klofn­ingi á aug­ljós­lega erfitt með að kyngja þeirri staðreynd þótt hún viður­kenni hana, en bind­ur von­ir sín­ar við að ein­hverj­ar skját­ur kunni að rek­ast yfir ryðgaðan gadda­vír­inn til smá­flokks­ins sem er á göng­unni sem slíkra flokka bíður ætíð sé sæmi­lega tekið á móti.“

Svo lýkur pistlinum sem ber vitni um verulega flókna stöðu á hægri væng stjórnmálanna. Þó pistillinn sé nafnlaus þarf engum blöðum um það að fletta að þarna heldur Davíð, fyrrverandi foringi Sjálfstæðisflokksins, um penna og otar honum í átt að Þorgerði Katrínu Gunnarsdóttur. Davíð gerir nýlegan pistil hennar að umfjöllunarefni og finnur efni hans flest til foráttu.

Kóngsdóttirin sem skrifar í Helgablaðið málgagn Viðreisnar

Eins og Vísir hefur fjallað ítarlega um eru greinarskrif Davíðs í Morgunblaðið farin að valda forystu flokksins verulegum ónotum, ama og vandræðum. Davíð er eindreginn andstæðingur 3. orkupakkans, gengur þar í takti við Sigmund Davíð Gunnlaugsson formann Miðflokksins, og telja nú margir Sjálfstæðismenn svo komið að Morgunblaðið geti ekki lengur talist málgagn Sjálfstæðisflokksins.

Sú staða út af fyrir sig sætir tíðindum og eflaust vilja þeir sem tala um að Morgunblaðið hafi mátt á við sem áður var meina að fylgisaukningu sem merkja má við Miðflokkinn megi einmitt rekja til stuðnings Davíðs og Morgunblaðsins við Sigmund Davíð og hans menn. Enda talar ritstjóri Morgunblaðsins eins og sá sem valdið hefur.

Davíð notar óspart sitt þekktasta stílbragð, uppnefni, og hefur skrif sín á því að segja, að hætti hússins, pistil Þorgerðar hlægilegan og sparkar í leiðinni í Fréttablaðið, sem Davíð hefur reyndar áður sagt að hann lesi ekki og þekki engan sem það gerir:

„Þor­gerður skrif­ar í grein í mál­gagn Viðreisn­ar, Helga­blaðið, sem kallað er, og minn­ir á að hún „hafi verið í hópi fólks sem stóð and­spæn­is þeirri þungu ákvörðun að láta leiðir skilja með Sjálf­stæðis­flokkn­um.“

Ekki er víst að forysta Sjálfstæðisflokksins geti varpað öndinni léttar við það að Þorgerður og Viðreisn sé skotspónn hins úfna ritstjóra. Því hún er hvergi nærri laus af önglinum og eru hrósyrði Þorgerðar um nokkra forystumenn flokksins einmitt höfð þeim til háðungar, í meðförum Davíðs. Sá sem á Þorgerði að vini þarf enga fleiri:

 

Leynimakk ríkisstjórnar um orkupakka

„Næst sneri Þor­gerður að deil­um í Sjálf­stæðis­flokki eft­ir upp­nám er leyni­makk rík­is­stjórn­ar um orkupakka barst upp und­ir yf­ir­borð svo braut á. Fyrstu tveim­ur pökk­un­um var lætt í gegn svo eng­an grunaði nokkuð ljótt. Þar var mjög nærri stjórn­ar­skránni höggvið. Nú þegar pakk­arn­ir þrír liggja sam­an fyr­ir þarf ein­dreg­inn brota­vilja til að hafna ásök­un­um um stjórn­ar­skrár­brot. En Þor­gerður seg­ir að nú „blasi við ein grimm­ustu inn­an­flokksátök sem sög­ur fara af í ára­tugi“ og læt­ur eins og þá horfi hún til gjörv­allr­ar sögu flokka­kerf­is­ins.“

Pistlahöfundur telur þetta einkennilega meldingu úr þeirri áttinni:

„Þessi fyrr­ver­andi vara­formaður Sjálf­stæðis­flokks kynnti fyr­ir­vara­laust brott­för sína þaðan og jafn­framt eins og í fram­hjá­hlaupi að Þor­steinn Páls­son, fyrr­ver­andi formaður, yrði sam­ferða sér út. Kúnstug aðferð það,“ skrifar Davíð sem er eins og fíllinn og mun seint gleyma því eða fyrirgefa þegar Þorgerður sagði sig úr Sjálfstæðisflokknum.

Þorgerður Katrín sem fauk í viðreisnargolunni

Davíð rekur sig í gegnum pistil Þorgerðar og kemur þar að þegar hún beinir orðum sínum að Bjarna Benediktssyni formanni flokksins. Sem að sögn Davíðs reyndi lengi að gera Þorgerði til hæfis „áður en hún fauk í viðreisn­ar­gol­unni“. 

Og áfram gengur dælan: 

„Nú seg­ir Þor­gerður að vond­ir menn hafi for­mann­inn að háði og spotti „með því að benda í sí­fellu á að hann hafi verið á móti mál­inu í byrj­un en sé því nú fylgj­andi af óskilj­an­leg­um ástæðum“. En seg­ir svo, að „ástæðan fyr­ir skoðana­flökti for­manns­ins sýn­ist mér leiða af stöðu hans í þverklofn­um flokki. Í byrj­un umræðunn­ar vissi hann að það var ekki stuðning­ur í bakland­inu. Eft­ir fram­göngu vara­for­manns, rit­ara og ut­an­rík­is­ráðherra hef­ur hann talið að nægj­an­leg­ur stuðning­ur væri kom­inn þannig að hon­um væri óhætt að tala eins og hjarta hans slær. Það virðist ekki hafa verið rétt stöðumat“.

Þetta segir Davíð með ólíkindum og allt hér á haus. Sem má til sanns vegar færa en það fer sjálfsagt eftir því hver horfir hvern og hvað má sjá á hlið.