Krefjast endurupptöku í máli afgönsku feðganna

Magnús Davíð Norðdahl, lögfræðingur, hefur farið fram á endurupptöku máls Sawari feðganna. En fyrir hönd Asadulla Sawari og sona hans Said Mahdi Sarwari og Said Ali Akbar Sarwari er farið fram á að ákvörðun Útlendingastofnunar verði felld úr gildi í ljósi breyttra aðstæðna. Til vara er krafist að nefndin samþykki frestun réttaráhrifa þannig að fjölskyldan geti dvalið hér á landi á meðan dómstólar komast að endanlegri niðurstöðu.

Asadulla Sawari sagði í samtali við fréttastofu á dögunum að það væri óbærilegt að horfa upp á syni sína, níu og tíu ára, vera óörugga og glíma við andlega kvilla vegna fyrirhugaðrar brottvísunar þeirra úr landi. Brottvísun til Grikklands sem átti að fara fram síðastliðinn sunnudag var frestað vegna andlegs ástands tíu ára drengsins. Asadulla segir ekkert nema götuna bíða fjölskyldunnar.

Krafa um endurupptöku er reist á þeim grundvelli að aðstæður hafa verulega breyst frá því ákvörðun var tekin. Nú liggur fyrir mat geðlæknis og hjúkrunarfræðings á BUGL  að Said Mahdi Sarwari sé ekki í ástandi til að fara í flug vegna vanlíðan og mikils kvíða samkvæmt bráðamóttökuskrá sem undirrituð er af Þóru Kristinsdóttur, lækni, og Ólafi Heiðari Þorvaldssyni, sérfræðilæknis.

Mat sérfræðinga að drengurinn glími við kvíða og depurð

Í endurupptökubeiðni segir: „Gögn málsins benda til þess að umbjóðandi minn glími við alvarleg einkenni kvíða og depurðar auk einhverra áfallaeinkenna. Þá var það mat ofangreindra lækna að umbjóðandi minn uppfylli greiningarskilmerki fyrir „depressive episode“.

Þá segir einnig að íslenskum stjórnvöldum beri að hafa hagsmuni barna að leiðarljósi við alla ákvarðanatöku samkvæmt Barnasáttmála Sameinuðu þjóðanna sem Ísland hefur lögfest.

Það væri andstætt lögum og alþjóðlegum skuldbindingum ef sú afstaða yrði tekin að kanna ekki frekar mat sérfræðilækna á barna- og unglingageðdeild BUGL á heilsu drengsins.

 

Yrði óvarlegt að rjúfa læknismeðferð

„Áréttað er ofangreind bráðamóttökuskrá þess efnis að fyrirhuguð brottvísun muni valda umbjóðanda mínum, Said Mahdi Sarwari, sálrænum skaða eins og er,“ segir í beiðninni. Þessar upplýsingar hafi ekki legið fyrir á fyrri stigum en ástand barnsins var það alvarlegt að stoðdeild lögreglunnar treysti sér ekki til að framkvæma þá brottvísun sem fyrirhuguð var í vikunni.



„Stoðdeild stendur oft frammi fyrir því að flytja aðila í slæmu andlegu ástandi úr landi en það að brottvísun hafi verið frestað segir sitt um alvarleika þessa máls og þeirra veikinda sem Said Mahdi Sarwari er að glíma við.

Þá verður einnig að ítreka það sem fram kemur í bráðamóttökuskránni að frekari meðferð er fyrirhuguð hjá sérfræðingum á barna- og unglingageðdeild Landspítalans. Óvarlegt væri að rjúfa þá meðferð sem hafin er enda væri það andstætt hagsmunum barnsins.“