Ensku­mælandi verk­takar sem bjóða mal­bikun dreifðu aug­lýsinga­miðum í hús í Lang­holts­hverfi

Enskumælandi verktakar sem bjóða malbikun og aðra vinnu við lóðir og íbúðahús gengu í hús í Langholtshverfi í Reykjavík í morgun og dreifðu auglýsingamiðum um starfsemi sína.

Þá bönkuðu þeir upp á hjá einhverjum íbúum og buðu þjónustu sína samkvæmt færslu í Facebook-hópi íbúa í hverfinu. Færslan hefur vakið nokkra athygli, ekki síst í ljósi fregna í gær og í dag af vegagerðarmönnum sem boðið hafa svipaða þjónustu undanfarið á Suður- og Vesturlandi.

Ekki er hægt að fullyrða að sömu menn hafi verið á ferð í Reykjavík í morgun en á auglýsingamiðanum er númer sem áhugasömum viðskiptavinum er bent á að hringja í. Fyrirtækið heitir JC Verktaki.

 

Blaðamaður Vísis reyndi að hringja nokkrum sinnum í númerið og fékk alltaf þau skilaboð að annað hvort væri slökkt á símanum eða hann utan þjónustusvæðis.

Á ekki von á því að það séu margir svona vinnuflokkar á ferðinni

Oddur Árnason, yfirlögregluþjónn hjá lögreglunni á Suðurlandi, segir að eftir því sem hann best viti hafi sömu menn verið á ferðinni um Suður- og Vesturland undanfarna daga og boðið fólki malbikun. Hann eigi ekki von á því að margir svona flokkar séu á ferðinni.

Greint var frá því í gær að enskumælandi menn hefðu lagt olíumöl að heimreiðinni að Lækjarkoti, bæ skammt frá Borgarnesi, síðastliðinn mánudag en hafi svo ætlað að rukka þrjár milljónir króna fyrir verkið.

Ábúendur á bænum greiddu ekki fyrir verkið og þá hefur Vegagerðin kært málið þar sem hún hefur umsjón með veginum og verkið var illa unnið af hálfu mannanna.

Fram kom í frétt Vísis í morgun að fyrirtækið sem mennirnir vinna fyrir sé breskt og að mennirnir telji sig vera að stunda viðskipti hér á landi eins og borgurum á EES-svæðinu standi til boða.

„Þeir flúðu nú eiginlega undan okkur upp á Vesturland. Við erum að hafa afskipti af þeim hérna 4. og 5. júlí. Þá eru þetta fjórir staðir sem þeir hafa verið að flækjast á sem koma hér inn á borð til okkar og þetta er í rauninni bara til meðferðar,“ segir Oddur í samtali við Vísi.

Ekki sjálfgefið að um fjársvik sé að ræða

Hann segir mennina hafa unnið verk á fjórum stöðum.

„Í öllum tilfellum er fólk búið að greiða fyrir einhverja ákveðna vinnu en síðan telja menn sig hafa verið hlunnfarna og þá er hringt í lögreglu.“

Þeir sem leitað hafa til lögreglu telja sig þannig ekki hafa fengið það sem samið var um í upphafi og gengið var út frá þegar var samið var um verðið og vinnuna.

 

Oddur vill ekki gefa upp um hversu háar upphæðir er að ræða í einstökum málum þar sem þau séu enn til rannsóknar. Þá kveðst hann ekki hafa upplýsingar um það hvar efnið sem mennirnir hafa notað sé keypt.

Greint var frá því á vef RÚV fyrr í dag að svo virðist sem að tveir bílar vegagerðarmannanna séu á leiðinni úr landi en þeir standa nú á svæði skipafélagsins Smyril Line í Þorlákshöfn. Þaðan fer flutningaskipið Mykines yfir til Evrópu á morgun.

Oddur kveðst hafa heyrt af bílunum í Þorlákshöfn og reiknar með að ef þetta séu sömu menn og verið hafa á ferðinni um Suðurland þá séu þeir á leiðinni úr landinu.

En hvað getur lögregla gert ef þeir fara úr landi en eru búnir að hafa fé af fólki?

„Það er ekki sjálfgefið að þetta geti flokkast sem fjársvik. Þannig er að ef þú ferð og kaupir vöru, semur um verð og greiðir fyrir hana þá er ekki sjálfgefið að þetta séu fjársvikamál. En það er svo aftur spurning um skil á sköttum og öðru slíku og það eru tvísköttunarsamningar sem taka á því og ég reikna með að það sé til skoðunar,“ segir Oddur.