World Class í Vatnsmýrina

World Class opnar tvö þúsund fermetra heilsuræktarstöð á jarðhæð í nýbyggingu Grósku í Vatnsmýrinni við hlið Háskóla Íslands í byrjun mars næstkomandi.  

Á vef World Class segir að stöðin eigi eftir að innihalda fullbúinn tækjasal með Life Fitness og Hammer Strength tækjum, hjólasal, heitan hóptímasal með infrarauðum hita í lofti og gólfi ásamt hita og rakatækjum fyrir Hot Yoga og almennan hóptímasal. Í stöðinni verður heitur pottur, kaldur pottur fyrir víxlböð og kæliþjálfun, infrarauð sauna og þurrgufa.

Verður stöðin sú sextánda sem rekin er af World Class.

Hér fyrir neðan má sjá kynningarmyndband fyrir Grósku hugmyndahús en á heimasíðu þess er sagt að húsið verði fullklárað í desember 2019.