Búa sig undir að stór fellibylur nái landi

Japanir búa sig nú undir að afar stór fellibylur gangi á land en búist er við því að óveðrið, sem nefnt er Hagibis, gangi yfir mið- og austurhluta landsins um helgina.

Veðurspáin hefur þegar gert það að verkum að nokkrum leikjum á heimsmeistaramótinu í rugby, sem fram fer í Japan, hefur verið frestað.

Hagibis er nú staddur í grennd við Chichi-eyju á Kyrrahafi og mælist vindhraði um 75 metrar á sekúndu og meira í sterkustu hviðunum.

Hagibis er nú fimmta stigs fellibylur en vonast er til að aðeins dragi úr kraftinum áður en hann skellur á Japan.

Afar sjaldgæft er að svo sterkir fellibyljir komi svo seint á árinu.