Mbappe og Icardi með tvennu í stórsigri á Marseille

Það var mögnuð stemning þegar PSG fékk Marseille í heimsókn í frönsku úrvalsdeildinni í fótbolta í kvöld. Bæði félög þekkt fyrir alræmdar stuðningsmannasveitir sem eiga það til að fara yfir strikið.

Innan vallar hafa PSG hins vegar á að skipa töluvert betra liði og það kom bersýnilega í ljós í kvöld þó Parísarliðið léki án brasilísku ofurstjörnunnar Neymar. 

Áður en fyrri hálfleikur var allur hafði PSG skorað fjögur mörk gegn engu og sáu þeir Kylian Mbappe og Mauro Icardi um markaskorun þar sem þeir skoruðu tvö mörk hvor.

Ekkert mark var skorað í síðari hálfleiknum og lauk leiknum því með þægilegum 4-0 sigri PSG sem trónir á toppi deildarinnar og er strax komið með átta stiga forskot eftir ellefu umferðir.