Gísli Pálmi hæðist að ásökun um innbrot

Rapparinn Gísli Pálmi hefur ásamt ungri konu verið sakaður um að hafa brotist inn í íbúð við Vallarás í gærkvöldi um tíu leytið og haft þaðan með sér eitt og annað úr íbúðinni. Það gerir Þórdís Árnadóttir með afgerandi hætti á Facebooksíðu sinni, í færslu þar sem hún nafngreinir parið og vandar þeim ekki kveðjurnar. Skilið dótinu!

Gísli Pálmi hæðist að þessu á sínum Facebookvegg, deilir færslu Þórdísar með orðunum: „BÍDDU VÁA! má maður bara ekkert lengur .. hahaha hva er að frétta“?

Vísir hefur gert ítrekaðar tilraunir til að ná sambandi við tónlistarmanninn nú í allan morgun en án árangurs.

Aldrei verið eins reið áður

Þórdís segist hins vegar vera fjúkandi reið en hún er sannfærð um að það hafi verið þau Gísli og hin unga kona sem brutust inn í íbúð stjúpdóttur hennar. Hún segir vitni til staðar, náðst hafi bílnúmer sem rekja má til bíls í eigu föður Gísla Pálma auk þess sem konan hafi talað af sér í símtali í gærkvöld, en kunningsskapur er milli stjúpdóttur hennar og umræddrar konu.

Þórdís segir að þegar sá sem býr í íbúðinni sé vinur stjúpdóttur sinnar. Þau fóru í bíó og þegar þau komu aftur var búið brjótast inn, sparka upp hurðinni og stela öllu steini léttara. Meðal annars tölvu sem dóttir hennar á þar sem í eru ritgerðir og annað sem hún var að vinna fyrir skólann, en hún stefnir að því að útskrifast fljótlega.“

„Ég hef aldrei verið svona reið, ég er brjáluð,“ segir Þórdís og vandar þeim ekki kveðjurnar sem hún er sannfærð um að séu hinir seku. Hún segir lögregluna komna á sporið, þökk sé Facebook-færslu sinni. Og hún hefur farið víða, nú þegar hafa tæpir 600 deilt henni víðs vegar um Facebook. Þórdís segist hvergi smeyk þó svo megi heita að Gísli Pálmi hafi tengsl við undirheimana.

Nýtt að grunaðir séu nafngreindir opinberlega

En, er lögreglan komin á sporið? Valgarður Valgarðsson, aðalvarðstjóri hjá lögreglunni á höfuðborgarsvæðinu, staðfesti í morgun í samtali við Vísi að málið væri til skoðunar hjá lögreglunni. Fulltrúar hafi farið á vettvang í gærkvöldi, tekið skýrslu af húsráðanda sem hafi tilkynnt að munum hafi verið stolið.

Um það hvort lögreglan sé komin á sporið segir Valgarður að það liggi fyrir ákveðnar upplýsingar og ákveðnir aðilar hafi verið nefndir sem gætu tengst málinu. Meira sé ekki hægt að segja um það. Málið er ekki komið á það stig að fólk hafi verið yfirheyrt vegna þess.

Valgarður segir þetta tiltölulega nýja stöðu sem bæði lögregla og fjölmiðlar standi frammi fyrir, að hinir grunuðu séu nafngreindir opinberlega.

Rappar um það sem hann hefur upplifað

Gísli Pálmi er einn þekktasti tónlistarmaður landsins. Hann lagði spilin á borðið, eins og þar stendur, í viðtali við Dóra DNA fyrir þremur árum og þá sagðist hann meðal annars syngja um það sem hann hefði upplifað.

„Maður er löngu kominn á þann stað að vera fíkill. Maður er búinn að brjótast inn út um allt og maður var að fjármagna neysluna sína með allskonar hætti. Með innbrotsþýfi og stolnu dóti. Maður lærði þetta af eldri gaurum og svona endist maður í þessu. Þegar ég var 15-16 ára gamall var ég kominn langt út af brautinni og var á kolvitlausum stað.“