Læknaneminn sem gaf út vinsælasta lag landsins í sumar heiðraður í Slóvakíu

Læknaneminn Victor Guðmundsson, betur þekktur sem tónlistarmaðurinn Doctor Victor, hlaut í síðustu viku heiðursverðlaun frá borgarstjóranum í Martin í Slóvakíu þar sem hann stundar læknanám fyrir störf sín í þágu menningar, góðgerðarmála og listar, en er þetta í fyrsta sinn sem nemanda er veitt þessi verðlaun þar úti.

„Þetta var mjög skemmtilegt og mikill heiður, en ég fékk hringingu frá bæjarstjóranum þegar ég var staddur á Akureyri í 6. árs verknáminu mínu og boðaður á sérstaka athöfn í Slóvakíu. Ég kom síðan hingað út til Martin í síðustu viku og tók við verðlaununum á skemmtilegri athöfn, en ég ákvað að skella í slóvakíska ræðu í tilefni af þessu,” segir Victor.

 

Victor er á sínu sjötta og síðasta ári í læknisfræði við læknaskólann Jessenius Faculty of Medicine úti í Martin en hann stofnaði meðal annars Félag íslenskra læknanema í Slóvakíu (FÍLS) ásamt þeim Auði Jónu Einarsdóttur, Ernu Markúsdóttur og Þórdísi Magnadóttur.

Hann hefur einnig verið duglegur að halda viðburði þar sem hann spilar sjálfur og á vegum FÍLS fyrir nemendur skólans og bæjarbúa, en hann kom svo að skipulagi tveggja góðgerðarviðburða síðustu tvö ár þar sem söfnuðust um 4.000 evrum fyrir barnadeild geðdeildar spítalans í bænum. Hann segir að íslenska samfélagið þar úti hafi vaxið mikið með árunum og sé duglegt að sameinast.

„Það er magnað að sjá hversu margir Íslendingar eru komnir hingað út til Slóvakíu að læra. Fyrst voru þetta um tíu íslenskir nemendur, en nú erum við yfir hundrað og það er góð stemmning hérna. Ég hef mjög gaman að því að sameina fólk og gera eitthvað skemmtilegt, en tónlistin hefur alltaf verið í mér frá því ég var lítill og hún fékk loksins að blómstra hér úti þegar ég fór að gera mína eigin tónlist og byrjaði að spila í Slóvakíu og löndunum hér í kring. Mér finnst mikilvægt að fólk sé óhrætt að stökkva á tækifæri, sérstaklega ef þau eru á þeirra áhugasviði.”

Það má þó segja að tónlistin hans Victors hafi sprungið út á Íslandi síðasta sumar, en hann gaf út tvö lög - eitt með Svölu Björgvins sem heitir Running Back og sumarsmellinn Sumargleðin ásamt þeim bræðrum Ingó Veðurguð og Gumma Tóta og er lagið með um 1.000.000 spilanir eftir einungis hálft ár.

„Það var í rauninni mjög fyndið hvernig þetta þróaðist með Sumargleðina, en ég fékk það verkefni í hendurnar að gera þemalag fyrir sumarhátíðina Sumargleðin og mátti gera hvað sem ég vildi. Ég var á þessum tíma á fullu í prófum, en ætli það hafi ekki hjálpað mér að gera eitthvað vel hresst sumarlag og peppa mig í sumarið sem var framundan. Ég hafði svo samband við Ingó og Gumma Tóta sem voru klárir í þetta, en við vorum allir staddir í sitt hvorum löndum. Gummi tók upp sinn part í Svíþjóð, Ingó sinn part á Íslandi og Sæþór Kristjáns hjálpaði okkur svo að setja þetta saman og á innan við mánuði var lagið tilbúið og gáfum við það út í lok maí.”

Hittust í fyrsta skipti á Þjóðhátíð

„Ég var ennþá úti í Slóvakíu í lokaprófum þegar lagið kom út, en við vorum þá aldrei búnir að hittast og höfðum ekki hugmynd um hversu vinsælt þetta lag myndi verða. Það var ekki fyrr en ég kom heim til Íslands sem ég fór að heyra þetta út um allt í útvarpinu og á skemmtistöðum. Mesta sjokkið var svo þegar við fórum á Þjóðhátíð, en þá vorum við beðnir um að taka það á stóra sviðinu með FM95BLÖ og hittumst við þá þrír í fyrsta skipti klukkutíma áður en við spiluðum lagið saman. Það er líklegast eitt magnaðasta móment sem ég hef upplifað - að sjá 20.000 manns dansa og syngja við lag sem maður gerði.”

Nóg framundan

Victor stefnir á að klára læknanámið næsta sumar, en það verður mjög fjölbreytt ár.

„Næsta sumar verður mjög fjölbreytt, en þá klára ég læknisfræðina og svo fékk ég áskorun frá hlaupaþjálfaranum mínum Arnari Péturs að fagna því með því að taka heilt maraþon með honum, þannig ég ætla að keyra á það líka. En ég stefni á að flytja heim til Íslands eftir læknanámið og er með fullt af hlutum plönuðum fyrir næsta ár sem ég er mjög spenntur fyrir. Mig langar allavegana að halda áfram að tvinna læknisfræðina og tónlistina saman á meðan ég get en það kemur svo í ljós hvernig þetta þróast.”

Hægt er að fylgjast með Victor á Instagram @doctorvictorsound eða á Facebook undir Doctor Victor.