Danero aftur til ÍR

Danero Thomas er genginn í raðir ÍR á nýjan leik. Karfan.is greinir frá.

Það sem af er tímabili hefur Danero leikið með Hamri í 1. deildinni. Þar var hann með 17,2 stig, 6,0 fráköst og 2,6 stoðsendingar að meðaltali í leik.

Danero lék með ÍR hálft tímabilið 2016-17 og svo allt tímabilið 2017-18. Á síðasta tímabili lék hann með Tindastóli.

ÍR varð fyrir mikilli blóðtöku þegar Sigurður Gunnar Þorsteinsson sleit krossband í hné í fyrsta leik sínum með liðinu. Hann leikur ekki meira með ÍR á þessu tímabili.

Danero, sem er 33 ára, hefur leikið hér á landi síðan 2013. Hann er með íslenskan ríkisborgararétt og hefur leikið þrjá landsleiki.

ÍR er í 6. sæti Domino's deildar karla með sex stig eftir sex umferðir. Næsti leikur liðsins er gegn Fjölni í Seljaskóla á föstudaginn.