Eygló Ósk komst ekki áfram í sinni bestu grein

Eygló Ósk Gústafsdóttir komst ekki áfram úr undanrásum í 100 metra baksundi á Evrópumeistaramótinu í 25 metra laug sem hófst í Glasgow í dag.

Eygló Ósk synti á 1:00.38 mín. sem skilaði henni 24. sætinu í undanrásum en aðeins sextán fyrstu komust áfram í undanúrslitin.

Eygló Ósk var um hálfri sekúndu frá tímanum sínum á ÍM25 í nóvember og næstum því þremur sekúndum frá Íslandsmeti sínu en hún synti á 57.42 sekúndum þegar hún vann brons á EM í Netanya í Ísrael árið 2015.

Að loknu sundi var Eygló Ósk þreytt og sagðist ekki hafa náð upp hraða samkvæmt frétt á heimasíðu Sundsambands Ísland. Hún sagði að ekkert sérstakt hefði komið upp en að hún hefði fundið það strax í upphafi sunds að þetta væri þungt og hún hefði ekki náð tökum á vatninu.

Í stuttu spjalli á leið til búningsklefa sagði Eygló einnig að hún væri búin að vinna mjög mikið með styrktarþjálfara undanfarið og hún gæti orðið hreyft sig eðlilega, þannig að nú væri komið að hraðaþjálfun.

Eygló Ósk hefur verið að glíma við meiðsli í baki undanfarin ár, en hefur verið á uppleið á þessu ári. Hún synti greinina í janúar á 1:03,10 mín., í september á 1:01,10 mín, og svo fór hún undir mínútuna á ÍM25 þann 9.nóvember á þessu ári þegar hún synti á 59,94 sekúndum.  

Árangurinn í morgun eru því einhver vonbrigði en það jákvæða er að Eygló Ósk virðist vera búin að vinna sig í gegnum meiðslin sem hafa háð henni. Það veit á gott.