Opnað fyrir umferð um Ljósavatnsskarð

Búið er að opna fyrir umferð á hringveginum í gegnum Ljósavatnsskarð. Það er þó gert með fyrirvara enda snjóflóðahætta á svæðinu að því er segir í tilkynningu frá lögreglunni á Norðurlandi eystra á þriðja tímanum.

Veginum var lokað í gærkvöldi eftir að snjóflóð féll yfir veginn. Bíl var ekið inn í flóðið en engin slys urðu á fólki.

Ökumenn eru beðnir um að gæta fyllstu varúðar enda mokstri ekki lokið að fullu. Gera má ráð fyrir að þjóðveginum verði lokað síðla kvölds miðað við veðurspá fyrir kvöldið.