Rútujeppi úr áli vísir að íslenskri bílaframleiðslu

Íslenskt fyrirtæki hefur samið við Grænlendinga um að sérsmíða umhverfisvæna bíla til að nota á fyrsta þjóðvegi Grænlands. Þetta yrði fyrsti raðsmíðaði íslenski bíllinn og byggður á áratuga reynslu Íslendinga af jeppaferðamennsku á hálendinu. Frá þessu var greint í fréttum Stöðvar 2.

Bíllinn er blanda smárútu og ofurjeppa og er búinn að vera fimmtán ára þróunarverkefni Ara Arnórssonar. Frumgerðinni var fyrst ekið fyrir ári og núna standa vonir til að hann verði fyrsti bíllinn sem fari í raðframleiðslu á Íslandi.

„Ef allt gengur upp þá verður þetta fyrsti raðframleiddi íslenski bíllinn, já,“ segir bílahönnuðurinn Ari Arnórsson.

Ari segir bílinn byggðan á áratuga reynslu Íslendinga af jeppaferðum um hálendið og hannaðan frá grunni út frá þörfum ferðaþjónustu og björgunarsveita.

Þessa reynslu Íslendinga vilja bæjaryfirvöld í Sisimiut nýta sér þegar gerð fyrsta þjóðvegar Grænlands, Arctic Circle Road, er að hefjast milli bæjarins og Kangerlussuaq-flugvallar.

Hér má sjá frétt Stöðvar 2:

Til að þróa samgönguverkefnið var í byrjun þessa árs undirritað samkomulag milli sveitarfélagsins Qeqqata, Arctic Circle Carrier, sem Magnús Jónsson, verkfræðingur í Sisimiut, stendur að, og íslenska félagsins Jakar.

„Við ætlum að reyna að hefja þessar samgöngur næsta sumar, þannig að við höfum ár í það,“ segir Ari.

Vegna fjárskort verður vegurinn í fyrstu aðeins lagður sem slóði í líkingu við íslenska hálendisvegi en Grænlendingar telja svona tæki henta til að flytja ferðamenn allt árið við þær aðstæður sem þar eru.

„Það er meiningin að afhenda þrjá svona bíla. Þeim gæti fjölgað en þeim fækkar ekki. Þannig að þetta verða að minnsta kosti þrír.“

Þar sem bíllinn er að mestu smíðaður úr áli er hann óvenju léttur en Grænlendingar vilja byggja upp græna ferðamennsku og býðst þeim að fá bíla sem ekið verður á sjálfbærri orkuframleiðslu.

„Á íslensku rafmagni, í formi metanóls frá Carbon Recycling,“ segir Ari.

Sjálfstæð fjöðrun á öllum hjólum á að tryggja þægindi farþega, - upplifunin verði þar af leiðandi eins og að svífa á töfrateppi, segir hann.

Helsti fjárfestirinn með Ara er Bílaleigan Geysir en verkefnið hefur einnig notið opinbers stuðnings.

„Þessi frumgerð var smíðuð að mestu leyti með stuðningi frá Tækniþróunarsjóði.“

Hlutafélagið heitir Jakar og bíllinn Ísar, - kenndur við Ísland.

„Ís. Einn ís, margir ísar,“ segir Ari og sýnir kraftmikið viðbragð bílsins þegar hann tekur af stað.