Landsliðskonur ósáttar vegna ummæla um laun Önnu Bjarkar

Landsliðskonum í knattspyrnu og fleirum er verulega brugðið vegna ummæla sem féllu í hlaðvarpsþætti á mánudaginn. Þar kom fram sú skoðun að Anna Björk Kristjánsdóttir, sem samdi við Selfoss um helgina, væri á hærri launum en konur ættu skilið að fá. Fyrrverandi þjálfari í efstu deild kvenna fagnar umræðu um eldfim mál í kvennaboltanum.

Um er að ræða Hlaðvarpsþáttinn Dr. Football þar sem Hjörvar Hafliðason ræðir við Mikael Nikulásson, þjálfara karlaliðs Njarðvíkur, og Kristján Óla Sigurðsson, fyrrverandi leikmenn Breiðabliks, um allt og ekkert tengt fótbolta.

Þátturinn hefur notið töluverðra vinsælda í á annað ár en nokkur þúsund manns hlusta á hvern þátt. Fókusinn hefur nánast eingöngu verið á karlafótbolta en Hjörvar kynnti nýjan dagskrárlið til leiks á mánudaginn.

„Af því við vorum að tala um neðri deildirnar um daginn þá ætlum við að færa okkur yfir í kvennafótboltann,“ sagði Hjörvar. Ástæðan væri sú að styrktaraðili þáttarins, bílaleigan Avis, hefði óskað eftir því að rætt yrði um kvennafótbolta.

„Að sjálfsögðu verðum við við því,“ sagði Hjörvar.

Umræðuna má heyra eftir rúmar 33 mínútur að neðan.

Heitustu fréttirnar af kvennaboltanum hér heima þessa dagana er endurkoma Önnu Bjarkar Kristjánsdóttur í íslenska boltann en hún spilar með Selfossi í sumar. Selfyssingar, ríkjandi bikarmeistarar, safna liði og ætla sér greinilega stóra hluti. 

Dagný Brynjarsdóttir, lykilmaður í landsliðinu, er snúin heim og þá er fyrir reynsluboltinn Hólmfríður Magnúsdóttir.

Kristján Óli benti á að Anna væri sömuleiðis landsliðskona og minnti að hún væri miðvörður, sem hún réttilega er. Þessi félagaskipti væru Selfossi ekki ódýr.

„Ég veit alveg hvað þetta kostaði,“ sagði Mikael.

Þetta kostaði meiri pening en ég vil meina að leikmaður í kvennabolta eigi að fá. Hún er á hærri launum en flestir leikmenn í efstu deild karla.

Óhætt er að segja að ummælin hafi farið öfugt ofan í félaga Önnu Bjarkar í íslenska landsliðinu, a.m.k. hina varnarmennina í liðinu. Þrjár landsliðskonur hafa tjáð sig um málið á Twitter.

„Þetta er svo ótrúlega þreytt dæmi. Landsliðskona í fótbolta að koma heim eftir mörg ár í atvinnumennsku en á samt ekki skilið að fá laun eins og leikmaður í Pepsi deild karla. Frábært sign hjá Selfossi og gaman að sjá fleiri lið heima taka kvennafótboltann á næsta stig,“ segir Ingibjörg Sigurðardóttir, landsliðskona og varnarmaður hjá Vålerenga í Noregi.

Sif Atladóttir, reynslubolti í landsliðsinu og leikmaður Kristianstad DFF, er hugsi yfir ummælunum.

„Frábært að Avis vill styðja kvennaknattspyrnuna og finnst þá virkilega leiðinlegt að þetta sé umfjöllunin sem er gerð í þeirra nafni. Vona að þetta lagist eða að Avis færi sig til annarra hlaðvarpa.“

Glódís Perla, miðvörður FC Rosengård í sænsku úrvalsdeildinni, er verulega ósátt.

„Í framtíðinni þegar dóttir þín er búin að vinna hart að því allt sitt líf að verða landsliðskona í fótbolta og atvinnumaður. Skrifar síðan undir draumasamning við uppáhaldsfélagið þitt, Manchester United, og ætlar að bjóða þér í heimsókn á leik fyrir framan fullan völl, vona ég að þú munir eftir þessu commenti og afþakkir.“

Guðbjörg Gunnarsdóttir landsliðsmarkvörður varpar fram spurningu: 

Máni Pétursson, útvarpsmaður og fyrrverandi þjálfari kvennaliðs Stjörnunnar, er skýr í sinni skoðun varðandi launamálin. Það sé ekkert að þessu.

Þá fagnar hann umræðu á borð við þessa um kvennafótboltann. Það verði að vera hægt að ræða opinskátt um kvennaknattspyrnu.

„Það endurspeglar viðhorf marga að konur eigi að fá minna borgað í fótbolta og það er alveg hægt að rökstyðja það auðveldlega,“ segir Máni.