Dortmund reynir að koma í veg fyrir félagsskipti Sancho

Það hefur verið talið afar líklegt undanfarið að Jadon Sancho, leikmaður Dortmund, muni fara til Manchester United fyrir næsta tímabil. Félagsskiptin gætu nú verið í uppnámi.

Dortmund eru sagðir vera að teikna upp plan til að stöðva vistaskipti Sancho þrátt fyrir að leikmaðurinn vilji sjálfur fara til Old Trafford.

Dortmund hefur sett 115 milljón punda verðmiða á Sancho og þeir ætla sér ekki að hörfa frá því.

United vilja hinsvegar fá leikmanninn fyrir lægri upphæð vegna áhrifa heimsfaraldursins á fjárhaginn. Þeir gætu hinsvegar ákveðið að reyna aftur við leikmanninn að ári liðnu.

Dortmund eru sagðir ætla að hækka laun Sancho umtalsvert, úr 5,4 milljónum punda á ári í 9 milljónir punda, til að tryggja framtíð leikmannsins hjá félaginu. Það er þó talið að þessi enski landsliðsmaður vilji snúa aftur í ensku úrvalsdeildina eftir þriggja ára fjarveru, en hann var á mála hjá Manchester City.

Hinn 20 ára gamli Sancho hefur skorað 17 mörk og lagt upp 17 á tímabilinu og verður líklega hart barist um hann í sumar.