Nýr kjarasamningur kynntur fyrir flugfreyjum

Nýundirritaður kjarasamningur Icelandair og Flugfreyjufélags Íslands (FFÍ) verður kynntur félagsmönnum FFÍ á fundi sem boðað var til nú klukkan 11. Fjölmennt er á fundinn, sem haldinn er á Hilton Nordica-hótelinu við Suðurlandsbraut, og hófst hann með dynjandi lófataki félagsmanna.

Fulltrúar samninganefndar og stjórnar FFÍ kynna nýja kjarasamninginn. Til stendur að atkvæðagreiðsla um hann hefjist á miðvikudag, 22. júlí, og standi til og með mánudeginum 27. júlí.

Nýr kjarasamningur Icelandair og FFÍ var óvænt undirritaður aðfaranótt sunnudags. Hann byggir á fyrri samningi sem felldur var í atkvæðagreiðslu hjá FFÍ í lok júní, eftir langar og strangar kjaraviðræður. Þá felur nýi samningurinn m.a. í sér breytingar á tveimur umdeildum ákvæðum, að því er fram kom í tilkynningu FFÍ um helgina.

Uppfært klukkan 12:05:

Lítið hefur kvisast út af fundinum um einstök efnisatriði samningsins en eftir því sem fréttamaður á vettvangi kemst næst er um að ræða nær sama samning og felldur var í lok júní. 

Þá tók kynning á kjarasamningnum sjálfum skamman tíma en að henni lokinni tóku fulltrúar stjórnar og samninganefndar við fyrirspurnum. Heyra mátti lófatak eftir að hver félagsmaður hafði lokið máli sínu. Viðbúið er að fundinum ljúki nú skömmu eftir hádegi.