Fundu eftir­lýstan mann sofandi í rútu í Ár­bænum

Rúmlega sextíu mál voru skráð hjá lögreglu frá klukkan 17 í gær til klukkan fimm í morgun samkvæmt upplýsingum úr dagbók lögreglu.

Lögregla var kölluð til vegna manns í annarlegu ástandi sem var sofandi í rútu í Árbæ en þegar lögregla mætti á vettvang og vakti manninn kom í ljós að hann var eftirlýstur. Var maðurinn fluttur á lögreglustöð og vistaður í fangaklefa.

Í Kópavogi höfðu tvö þrettán ára börn klifrað upp á skólabyggingu en þegar þau voru komin upp á þak féll niður stiginn sem þau höfðu notað til þess að komast upp. Þegar lögreglu bar að garði hafði ein móðir mætt á svæðið til þess að bjarga þeim niður.

Þá aðstoðaði lögregla mann í Kópavogi sem hafði verið ofurölvi á reiðhjóli og fallið á höfuðið. Sjúkraflutningamenn skoðuðu manninn og var honum síðar ekið heim ásamt hjólinu, enda ekki í ástandi til þess að koma sér heim sjálfur að því er segir í dagbók lögreglu.

Lögregla stöðvaði för ungra drengja sem höfðu verið á rúntinum í Hlíðahverfi, en í ljós kom að þar var um fjórtán ára dreng að ræða sem hafði tekið bifreið ófrjálsri hendi og keyrt um með fjóra jafnaldra sína.

Í Garðabæ var ekið á þrettán ára dreng á vespu en hann slapp ómeiddur samkvæmt upplýsingum frá lögreglu. Lítils háttar skemmdir voru á vespunni.

Þá var talsverður erill í miðborginni en tveir ökumenn voru stöðvaðir vegna aksturs undir áhrifum áfengis eða fíkniefna. Annar ökumaðurinn hafði ekið á tvær bifreiðar og reynt að flýja vettvang og var sá vistaður í fangaklefa og verður færður í skýrslutöku þegar rennur af honum.

Einn var handtekinn í miðborginni vegna þjófnaðar úr verslun. Þegar öryggisvörður reyndi að stöðva manninn réðst maðurinn á hann en að lokum náðist að yfirbuga manninn og var hann vistaður í fangaklefa.