„Ólýsanlegt“ að sjá herbergi stúlkunnar sem grófst undir snjóflóðinu

Bjarni Benediktsson fjármálaráðherra, sem ásamt öðrum ráðherrum hefur verið á snjóflóðasvæðinu á Vestfjörðum í dag, segir það hafa verið ólýsanlegt að sjá inn í herbergi fjórtán ára stúlku sem grófst undir öðru snjóflóðinu sem féll á Flateyri undir miðnætti á þriðjudagskvöld. Þá hafi það verið dýrmætt að ræða við fólkið á svæðinu en setja þurfi metnaðarfyllri markmið í uppbyggingu ofanflóðavarna en nú eru í gildi.

Sjá einnig: Missti meðvitund í snjónum og man eftir sér á sjúkrabörunum

Þrjú stór snjóflóð féllu á Vestfjörðum í fyrradag, tvö á Flateyri og eitt á Suðureyri. Flóðin tvö á Flateyri, sem féllu úr Skollahvilft og Innra-Bæjargili, eru meðal allra stærstu snjóflóðum sem fallið hafa á leiðigarða í heiminum, samkvæmt mælingum snjóflóðasérfræðinga Veðurstofunnar. Flóðin ollu gríðarlegri eyðileggingu á Flateyri.

Bjarni sagði í samtali við fréttastofu á Flateyri í kvöld að það væri eitt að sjá myndir af atburðunum en annað að koma á staðinn.

„Það er líka dýrmætt að koma og tala við fólkið sem býr á þessum stöðum. Maður er auðvitað að mæta fólki sem er í áfalli og samfélagi sem er í áfalli. Það eru eðlilegar spurningar sem koma upp varðandi öryggi og framtíðina en mér finnst líka vonarglæta í því að finna fyrir þeim anda hjá heimamönnum að þeir vilji byggja upp og endurreisa það atvinnulíf sem skaðaðist,“ sagði Bjarni.

Inntur eftir viðbrögðum við gagnrýni á ofanflóðavarnir á svæðinu sagði Bjarni að endurskoða þurfi áætlanir um uppbyggingu. Varnirnar hafi verið byggðar hægar upp en til stóð.

„Og það er alveg hægt að segja það eins og er, við höfum verið að byggja hægar upp en tekjustofninn sem sérstaklega var tryggður fyrir þessa uppbyggingu getur fjármagnað. Á þessum byggingarhraða þá erum við ekki að fara að gera það sem til stóð víða um landið nema á áratugum og við þurfum að setja okkur metnaðarfyllri markmið en það,“ sagði Bjarni.

Þá kvað hann það hafa verið áfall að sjá aðstæður á Flateyri eftir snjóflóðið.

„Sú saga sem helst hefur hreyft við manni úr fjölmiðlunum er með þessa stúlku sem bjargaðist og að koma og tala við björgunarmennina, heyra þeirra hlið af þessari upplifun og kíkja síðan inn í herbergið hennar… það var svakalegt. Og mér var bent á það að það má sjá merki um það í sjónum að hún fékk blóðnasir. Þarna var herbergið einfaldlega troðfullt af snjó. Þetta er ólýsanlegt að koma á svona stað.“

Hér að neðan má sjá mynd af Bjarna og björgunarsveitarmönnum inni í herbergi stúlkunnar, sem sá fyrrnefndi birti á Twitter-reikningi sínum í kvöld.

Viðtalið við Bjarna má sjá í heild í spilaranum hér að neðan.

Stúlkan sem lenti undir flóðinu heitir Alma Sóley Ericsdóttir Wolf og er fjórtán ára. Hún lýsti því í samtali við fréttastofu í dag að hún hafi verið að kveðja vinkonu sína í netspjalli og að fara að halla sér þegar hún heyrði drunur. Þremur sekúndum síðar hafi hún verið föst í snjó, sem hafi verið eiginlega allt í kringum hana – og nánast eins og steypa.

Viðtalið við Ölmu og Önnu Sigríði Sigurðardóttur, móður hennar, má horfa á í spilaranum hér að neðan.