Icelandair aflýsir fjölda flugferða vegna óveðurs á morgun

Ákveðið hefur verið að aflýsa alls 24 flugferðum Icelandair til og frá Evrópu á morgun, 23. janúar, vegna slæmrar veðurspár. Þá verður flugi frá Bandaríkjunum til Íslands í kvöld einnig seinkað. Nákvæm tímasetning brottfara mun liggja fyrir fljótlega, að því er fram kemur í tilkynningu frá Icelandair.

Búist er við afar slæmu veðri næsta sólarhringinn og gular hríðarviðvaranir í gildi á Suðurlandi, Faxaflóa, Breiðafirði, Vestfjörðum, Ströndum og Norðurlandi vestra og Miðhálendi. Víða er gert fyrir suðvestan hvassviðri eða stormi, allt 23 m/s, éljagangi og lélegu skyggni. Viðvaranir byrja að taka gildi í kvöld og renna ekki út fyrr en seint á morgun.

Í tilkynningu frá Icelandair segir að verið sé að upplýsa farþega um þessar breytingar á flugáætlun. Mikið álag sé á þjónustuveri og eru farþegar beðnir um að sýna biðlund. Þá verði allir farþegar endurbókaðir og ný ferðaáætlanir sendar þeim í tölvupósti.

Eftirfarandi flugferðum 23. janúar hefur verið aflýst:

Flug FI532/FI533 til og frá Munchen

Flug FI568/FI569 til og frá Zurich

Flug FI520/FI521 til og frá Frankfurt

Flug FI554/FI555 til og frá Brussel

Flug FI430/FI431 til og frá Glasgow

Flug FI342/FI343 til og frá Helsinki

Flug FI306/FI307 til og frá Stokkhólmi

Flug FI318/FI319 til og frá Osló

Flug FI206/FI207 til og frá Kaupmannahöfn

Flug FI440/FI441til og frá Manchester

Flug FI416/FI417 til og frá Dublin

Flug FI 450/451 til og frá London Heathrow

Eftirfarandi flugferðum 23. janúar hefur verið seinkað:

Flug FI470/FI471 til og frá London Gatwick

Flug FI500/FI501 til og frá Amsterdam

Flug FI542/FI543 til og frá París, Charles De Gaulle

Flug FI204/ FI205 til og frá Kaupmannahöfn

Önnur flug til og frá Evrópu eru enn sem komið er á áætlun þó gera megi ráð fyrir seinkunum á þeim. Raskanir á flugi Icelandair næsta sólarhringinn hafa áhrif á ríflega 3000 farþega, að því er segir í tilkynningu. Nánari upplýsingar er að finna á vef Icelandair og upplýsingar um flug um Keflavíkurflugvöll má finna á vef Isavia.

Aðeins eru fáeinir dagar síðan óveður setti flugsamgöngur á landinu síðast úr skorðum. Aðfaranótt 13. janúar sátu um fjögur þúsund farþegar fastir á Keflavíkurflugvelli yfir nótt vegna norðanstorms. Átjánhundruð manns áttu bókað flug frá landinu og þá voru um 2.200 farþegar fastir í tíu þotum í allt að sex klukkustundir vegna hvassviðris.