Segja ríkið hækka laun langt um­fram lífs­kjara­samninginn

Stéttarfélagið Efling segir að ríkið hafi nú þegar samið við hálaunahópa um launahækkanir sem séu í raun langt umfram lífskjarasamninginn svokallaða sem Efling og VR undirrituðu við Samtök atvinnulífsins í byrjun apríl í fyrra.

Þetta kemur fram í tilkynningu frá Eflingu en þar segir að athugun félagsins á launatöflum í nýjum kjarasamningum félaga innan BHM við ríkið leiði í ljós að ríkið hafi þegar veitt „hálaunahópum prósentuhækkanir launa umfram hina flötu krónutöluhækkun í svokölluðum Lífskjarasamningi.“

Segir í tilkynningunni að í texta 2. greinar umræddra samninga BHM-félaga sé gefið til kynna að hækkanir á samningstímanum séu þær sömu og í lífskjarasamningnum, eða samtals 68 þúsund krónur.

Miklar umframhækkanir komi hins vegar í ljós þegar launatöflur í fylgiskjölum samninganna séu bornar saman. Ekkert sé minnst á þessar hækkanir í samningstexta.

Efling á nú í harðri kjaradeilu við borgina og hafa félagsmenn samþykkt verkfallsaðgerðir í næsta mánuði. Hefur Efling lagt fram tillögu í þeim viðræðum um það sem félagið kallar launaleiðréttingu fyrir þá lægst launuðu hjá borginni.

Slík leiðrétting felur í sér hærri krónutöluhækkanir en er að finna í lífskjarasamningnum og hefur tillagan meðal annars verið gagnrýnd harðlega af SA.

Í tilkynningu Eflingar nú segir að þær launahækkanir sem félagið fari fram á fyrir sína félagsmenn sem starfa hjá borginni séu sambærilegar við þær umfram launahækkanir sem hópar innan BHM-félaganna hafi fengið:

„Umframhækkanir hærra launaðra starfsmanna samkvæmt launatöflum umræddra BHM-félaga ná til mánaðarlauna sem voru á bilinu 570 til 885 þúsund krónur fyrir undirritun samnings.

Hækkanir launa á þessu bili ganga mikla lengra en hin umsamda flata krónutöluhækkun Lífskjarasamningsins upp á 68 þúsund krónur og eru þegar hæst lætur vel á annað hundruð þúsund krónur.

Í tilfelli launaflokks 22 hjá BHM er um að ræða heildarhækkun upp á 110.765 kr. en það er 42.765 kr. umfram flata krónutöluhækkun Lífskjarasamningsins.

Samanburður á launatöflunum sýnir að hækkanirnar virðast hafa verið stilltar af þannig að hærra launaðir hópar fái aldrei minna en 12,5% heildarhækkun launa á tímabilinu.

Ríkið hefur því umbreytt flötum krónutöluhækkunum Lífskjarasamningsins á almennum vinnumarkaði í prósentuhækkanir fyrir hærra launaða ríkisstarfsmenn.

Enn fremur eru í launatöflum BHM félaganna nýir og hærri launaflokkar þar sem hæstu grunnlaun fara yfir 1.270 þúsund. Svo virðist sem þeir flokkar muni einnig taka prósentuhækkunum umfram Lífskjarasamninginn.

BHM félagi í launaflokki 22 fær þegar upp er staðið um 63% hærri krónutöluhækkun á samningstímanum en launamaður á almennum vinnumarkaði sem starfar ofan við taxta og tekur kjör eftir kjarasamningum Eflingar eða VR.

Athuganir Eflingar á kjarasamningum BHM félaganna sýna þannig að Ríkið hefur þegar samið við hálaunahópa á íslenskum vinnumarkaði um launahækkanir umfram Lífskjarasamninginn.

Upphæðir þessara umframhækkana eru sambærilegar við launaleiðréttingu sem Efling hefur farið fram á fyrir hönd láglaunafólks hjá Reykjavíkurborg.

Tillögur Eflingar um launaleiðréttingu borgarstarfsmanna á lægstu launum hafa verið gagnrýndar harðlega af Samtökum atvinnulífsins fyrir að vera ekki í samræmi við flatar krónutöluhækkanir hins svokallaða Lífskjarasamnings.

Dagur B. Eggertsson borgarstjóri hefur rætt um Lífskjarasamninginn sem ófrávíkjanlegan ramma kjarasamningsgerðar og með þeim rökum hafnað tillögum Eflingar um sérstaka leiðréttingu lægstu launa,“ segir í tilkynningu Eflingar.