Aðeins eitt lag sungið á íslensku

Nú hefur verið ákveðið í hvaða röð lögin fimm koma fram á úrslitum Söngvakeppninnar 2020 sem fara fram í Laugardalshöll 29. febrúar. Þar mun koma í ljós hvaða lag verður fulltrúi Ísland í Eurovision söngvakeppninni sem haldin verður í Rotterdam 12., 14. og 16. maí.

Höfundar laganna hafa nú ákveðið á hvaða tungumáli lögin verða flutt í úrslitunum en reglur keppninnar kveða á um að á úrslitakvöldinu skulu öll lögin vera flutt á því tungumáli  sem höfundur hyggst flytja lagið í Eurovision söngvakeppninni í Rotterdam, sigri lagið hér heima.  Fjögur laganna verða flutt á ensku í úrslitunum í ár og eitt á íslensku.

Hér er keppnisröð laganna í úrslitunum

Meet me halfway – Ísold og Helga

Lag: Birgir Steinn Stefánsson og Ragnar Már Jónsson

Enskur texti: Birgir Steinn Stefánsson, Ragnar Már Jónsson og Stefán Hilmarsson

Kosninganúmer: 900-9901

Think about things – Daði og Gagnamagnið

Lag: Daði Freyr

Enskur texti: Daði Freyr

Kosninganúmer: 900-9902

Echo – Nína

Lag: Þórhallur Halldórsson og Sanna Martinez

Enskur texti: Þórhallur Halldórsson, Christoph Baer, Donal Ryan og Sanna Martinez

Kosninganúmer: 900-9903

Oculis Videre – Iva

Lag: Íva Marín Adrichem og Richard Cameron

Enskur texti: Richard Cameron

Kosninganúmer: 900-9904

Almyrkvi – Dimma

Lag: Dimma

Íslenskur texti: Ingó Geirdal

Kosninganúmer: 900-9905

Kosningafyrirkomulagið verður eins og í fyrra.  Alþjóðleg dómnefnd, sem tilkynnt verður á keppnisdegi, vegur helming á móti símakosningu almennings í fyrri hluta úrslitanna. Þau tvö lög sem fá flest stig fara þá áfram í svokallað einvígi og þá hefst önnur kosning á milli þeirra tveggja . Í þeirri kosningu gilda eingöngu símaatkvæði almennings en atkvæðin sem lögin fengu í fyrri kosningunni fylgja lögunum inn í einvígið. Það verður því stigahæsta lag kvöldsins sem fer með sigur af hólmi.

Mikið verður um dýrðir á úrslitakvöldinu en auk laganna fimm sem keppa mun Hatari, sigurvegari keppninnar í fyrra og norska sveitin Keiino, sem hlaut flest símaatkvæði áhorfenda í Eurovision söngvakeppninni í fyrra, stíga á svið.