Þýska­land lokar landa­mærunum að stærstum hluta á mánu­dag

Stjórnvöld í Þýskalandi hafa tilkynnt að landamærum ríkisins að Frakklandi, Sviss og Austurríki verði að stærstum hluta lokað á morgun, mánudag. Er það gert til að hefta útbreiðslu kórónuveirunnar.

Í frétt BBC segir að þeir sem halda yfir landamærin vegna vinnu verði þó áfram heimilt að fara á milli.

Önnur aðildarríki ESB hafa gripið til róttækra aðgerða að undanförnu til að stemma stigu við útbreiðslunni. Þannig hafa stjórnvöld í Austurríki bannað samkomur með fimm manns eða fleiri.

Stjórnvöld í Rúmeníu hafa lýst yfir neyðarástandi og þá hafa tékknesk stjórnvöld, sem hafa nú þegar lokað landamærum sínum, lýst því yfir að mögulega verði allir skikkaðir í sóttkví.

Tilkynningarnar koma í kjölfar aðgerða franskra og spænskra stjórnvalda í gær. Á Spáni hefur verið tilkynnt 97 tilvik þar sem fólk hefur látist af völdum veirunnar síðasta sólarhringinn og þá hefur verið tilkynnt um tvö þúsund ný smit á sama tímabili. Alls hafa 388 manns látist á Spáni af völdum veirunnar og telja smitin um átta þúsund. Í Frakklandi hafa fengist staðfest 4.500 smit og 91 dauðsföll.

Í Evrópu er ástandið sem verst á Ítalíu þar sem 1.441 manns hafa látist og 21.157 smitast.