Leikhúsin geta hafið æfingar að nýju á föstudaginn

Sviðslistafólk hér á landi getur að einhverju leyti tekið gleði sína á ný á föstudaginn þegar þeim verður heimilt að hefja æfingar á nýjan leik. Snertingar verða heimilar á æfingum í sviðslistum og tónlist frá og með þeim degi á sama hátt og leyft hefur verið í íþróttum.

Þetta kemur fram í nýrri auglýsingu Svandísar Svavarsdóttur heilbrigðisráðherra sem birt er á vef Stjórnarráðsins í dag. Ráðherra segir breytingar varðandi listafólkið vega þyngst í auglýsingu dagsins.

„Það sem skiptir mestu máli er heimild sviðslistafólks til þess að hefja æfingar með snertingu sem er þá líkt og hefur verið gert í íþróttunum og sama gildir líka um kvikmyndagerð,“ segir Svandís Svavarsdóttir í samtali við fréttastofu.

Mikillar óánægju hefur gætt meðal sviðslistafólks að íþróttafólk hér á landi geti stundað sínar æfingar og keppt leiki á meðan æfingar og sýningar í leikhúsum liggi niðri. Sendu stjórnendur sviðslistastofnana frá sér áskorun til yfirvalda um að gefa sviðslitastofnunum sömu undanþágu og íþróttahreyfingin hafði fengið.

Brynhildur Guðjónsdóttir borgarleikhússtjóri sagðist í samtali við fréttastofu í síðustu viku binda vonir við að leikhúsin fengju undanþágu frá tveggja metra reglunni svo unnt yrði að hefja æfingar fyrir sýningar leikársins.

„Við hefðum að óbreyttu átt að hefja sýningar á Níu lífum 13. ágúst síðastliðinn. Þá voru akkúrat 5 mánuðir frá því við frumsýndum og húsinu var lokað fyrir gestum. Það hefur verið lokað síðan. Allt okkar starfsfólk kom til starfa fyrr en áætlað var, með það fyrir augum að koma núverandi leikári af stað. Gildandi samkomutakmarkanir og sóttvarnareglur gera það að verkum að við komumst í rauninni hvorki aftur á bak né áfram,“ sagði Brynhildur.

Nú geta leikhúsin hafið æfingar á nýju en til þessa hafa aðeins tvær tveggja manna sýningar, þar sem hægt var að viðhafa tveggja metra regluna, verið í æfingu.

Auglýsing ráðherra gildir til 10. september.