„Hægir vindar og bjart­viðri á milli lægða með stífum vindi og úr­komu“

Það er víða kalt á landinu nú í morgunsárið líkt og oft vill verða eftir bjartar og hægar nætur.

Hægviðrið heldur áfram fram eftir degi og verður léttskýjað, þó skýjað með köflum norðaustantil og stöku skúrir sem eru líklegar til þess að falla suðaustanlands, að því er segir í hugleiðingum veðurfræðings á vef Veðurstofu Íslands.

Seinnipartinn verður svo vaxandi suðaustanátt og þá þykknar upp sunnan- og vestanlands þegar skil nálgast landið. Næstu vikuna verður svp umhleypingasamt:

„Í nótt og á morgun verður síðan allhvöss suðaustanátt og rigning með köflum sunna- og vestantil, en þurrt að kalla á Norðausturlandi. Umhleypingasamt verður næstu vikuna, hægir vindar og bjartviðri á milli lægða með stífum vindi og úrkomu,“ segir í hugleiðingum veðurfræðings.

Veðurhorfur á landinu:

Breytileg átt, 5-10 m/s og víða bjartviðri, en og stöku skúr á Suðausturlandi. Vaxandi suðaustanátt og þykknar upp eftir hádegi, 10-18 m/s og fer að rigna sunnan- og vestanlands seint í kvöld og nótt, en hægari og þurrt á austanverðu landinu. Hlýnandi veður, hiti 2 til 8 stig í kvöld.

Sunnan og suðaustan 10-18 á morgun, hvassast norðvestantil. Rigning, einkum sunnan- og vestantil en þurrt að kalla norðaustanlands. Hiti 7 til 12 stig.

Á laugardag:

Suðlæg átt, 10-18 m/s. Rigning sunnan- og vestantil, en þurrt að mestu um landið norðaustanvert. Hiti 5 til 12 stig, hlýjast norðanlands.

Á sunnudag:

Sunnan 10-18 m/s austantil á landinu, hæg breytileg átt á vesturhelmingi landsins, en gengur í norðvestan 8-13 seinnipartinn. Rigning, en lengst af þurrt norðaustanlands. Hiti 4 til 11 stig, svalast á Vestfjörðum.

Á mánudag:

Vestlæg eða breytileg átt 3-10 m/s. Skúrir um sunnan- og vestanvert landið, en skýjað með köflum og úrkomulítið austantil. Hiti 2 til 8 stig, hlýjast syðst.

Á þriðjudag:

Suðlæg átt og skúrir eða rigning með köflum, en skýjað og þurrt um norðaustanvert landið. Hiti 2 til 8 stig.

Á miðvikudag:

Líkur á hvassri austlægri átt með rigningu um land allt og hlýnandi veðri.