Sveindís Jane og Agla María efstar í bæði mörkum og stoðsendingum

Stóru leikirnir eru einmitt leikir fyrir stjörnur liðanna að sýna hvað þær geta og það verður krefjandi fyrir Íslandsmeistara Vals að stoppa tvo heitustu leikmenn Pepsi Max deildarinnar í stórleik Vals og Breiðabliks á morgun.

Sveindís Jane Jónsdóttir og Agla María Albertsdóttir fóru á kostum í fyrri leik Breiðabliks og Vals þar sem Sveindís Jane skoraði þrennu og Agla María gaf  þrjár stoðsendingar.

Valur og Breiðablik mætast í úrslitaleiknum um Íslandsmeistaratitilinn í Pepsi Max deild kvenna á morgun en leikurinn hefst klukkan 17.00 á Origo vellinum á Hlíðarenda og verður í beinni útsendingu á Stöð 2 Sport.

Breiðablik hefur skorað 22 mörkum meira en Valur í Pepsi Max deild kvenna í sumar og þar hafa þessir tveir leikmenn liðsins farið á kostum, bæði í að skora mörkin sem og að gefa stoðsendingar.

Sveindís Jane Jónsdóttir og Agla María Albertsdóttir eru núna í efstu sætunum á bæði listanum yfir flest skoruð mörk og flestar gefnar stoðsendingar.

Sveindís Jane Jónsdóttir er markahæsti leikmaður Pepsi Max deildarinnar með 14 mörk í 14 leikjum. Hún hefur skorað einu marki meira en Agla María Albertsdóttir og Elín Metta Jensen.

Agla María Albertsdóttir er aftur á móti sá leikmaður sem hefur gefið flestar stoðsendingar til þessa í sumar eða 15 stoðsendingar í 14 leikjum. Þar er Sveindís Jane Jónsdóttir aftur á móti í öðru sæti með 12 stoðsendingar.

Sveindís Jane Jónsdóttir hefur alls komið að 29 mörk með beinum hætti (14 mörk, 12 stoðsendingar, 2 skot sem fylgt var eftir og 1 fiskað víti sem gaf mark) en Agla María Albertsdóttir hefur komið að 28 mörkum Blika (13 mörk og 15 stoðsendingar).