„Ekki vera rass­haus og kvarta og kveina yfir að­gerðum þrí­eykisins“

Theodóra Mýrdal, leikskólakennari og sérkennslustjóri í leikskólanum Tjarnarseli, er með skýr skilaboð til þeirra sem kvarta yfir hertum aðgerðum yfirvalda og þríeykisins vegna kórónuveirufaraldursins.

„Ekki vera rasshaus!“

Theodóra þekkir áhrif faraldursins af eigin raun. Hún deilir reynslu sinni á Facebook og birtir mynd sem hún tók af sér þann 21. mars eða dagin eftir að hún var lögð inn á gjörgæslu vegna Covid-19.

Lungna-, lifrar- og heilahimnubólga

„Ég veiktist föstudaginn 13. mars og útskrifaðist loksins úr einangrun 1. maí. Já ég var í einangrun í 7 vikur! Ég var 5 daga á spítala, þar af voru 3 á gjörgæslu. Eftir alls konar rannsóknir þá var niðurstaðan sú að ég var með lungnabólgu, lifrarbólgu, og bólgu í heilahimnu. Púlsinn minn var mjög lágur meðan ég var veik, hann fór alveg niður í 31 slög á mínútu og þá var ég vakin með látum á gjörgæslu. Verkirnir sem ég upplifði voru bein- og vöðvaverkir af öðrum heimi,“ segir Theodóra.

Hún segist hafa misst allt bragðskyn og lyktarskyn. Röddina sömuleiðis vegna gífurlegrar hálsbólgu og þá hafi hún varla getað kyngt.

„Var með stöðugan höfuðverk allan tímann og hann fæ ég ennþá í dag. Ég var svo lasin að ég hafði varla orku að fara á klósett, ég mæddist við það að klæða mig. Hóstinn var svo mikill að ég bjóst alveg við að sjá lungun mín koma með í einu kastinu. Ég þurfti töluverðan vökva í æð á spítala og svo líka á Covid göngudeildinni.“

Hún telji sig þó hafa verið heppna að þurfa ekki að fara í öndunarvél á gjörgæslu. Hún hafi þó verið á morfínskyldum verkjalyfjum vegna verkjanna í líkamanum.

Eftirköstin engu skárri

„Mér leið eins og það væri verið að rífa mig í sundur. Að geta ekki dregið andann djúpt án þess að fá verk eins og það standi hnífur í lunganu.“

Veiran sé svo óútreiknanleg. Hún hafi vaknað að morgni og hugsað:

„Já, þetta verður kannski góður dagur, mér líður betur en í gær.“

Klukkustund síðar hafi hún legið með svo mikla beinverki og vanlíðan, eins og hún væri með 40 stiga hita.

„Alveg eins og veiran er óútreiknanleg þá eru eftirköstin ekkert betri. Ég er núna með lungnateppu og þarf að taka sterapúst á morgnana og kvöldin og inn á milli þarf ég að pústa mig. Fæ astmaköst upp úr þurru. Ef ég geri „of mikið“ yfir daginn fæ ég „covid19“ einkenni eins og beinverki og höfuðverk. Ég glími við mikinn einbeitingarskort (sem er ekki gott í minni vinnu né námi) og eftir vinnu þá kem ég heim úrvinda. Ég verð þreytt á núll einni...það er bara eins og einhver sé með takka og ýti á hann.“

Hún segist ekki vita hvenær hún nái fullri heilsu á ný. Læknar segi henni að þeir viti ekkert og að hún verði að vera þolinmóð.

„Þetta eru engin geimvísindi“

„Það vantar einfaldlega skýrar verklagsreglur til að koma covid19 fólki í endurhæfingu við hæfi,“ segir Theodóra.

Hún sé ekki með mótefni en læknar tjái henni að T-frumur hennar hafi myndað ónæmi. Því ætti hún ekki að veikjast aftur.

„En ég verð samt að segja að ég hræðist þetta dálítið, því það er enginn viss hvernig þessi veira hagar sér.“

Skilaboð Theodóru til landsmanna, nú þegar aðgerðir hafa verið hertar verulega - sérstaklega á höfuðborgarsvæðinu - eru skýr:

„Ekki vera rasshaus og kvarta og kveina yfir aðgerðum þríeykisins og ríkisstjórnarinnar, vertu þakklát/ur því trúðu mér ef þú veikist og færð sömu eftirköst og ég þá ert þú kannski ekkert á leiðinni í ræktina næstu mánuðina af sama krafti og núna. Notaðu grímu, þvoðu hendur, sótthreinsaðu þær og haltu 2 metra reglu! Þetta eru engin geimvísindi!“