Gary og Bjarni Ólafur klára ekki tíma­bilið með ÍBV

Eyjamenn hafa kvatt þrjá leikmenn, í bili að minnsta kosti, en þetta staðfestir Fótbolti.net í kvöld.

Þeir Gary Martin, Bjarni Ólafur Eiríksson og Jack Lambert munu ekki spila síðustu tvo leikina í Lengjudeildinni segir í fréttinni.

Gary og Jack munu báðir halda heim til Englands. Jack kom til ÍBV í sumar en Gary gekk í raðir ÍBV á síðustu leiktíð.

Hann raðaði inn mörkunum í Pepsi Max deildinni og þrátt fyrir að ÍBV hafi fallið varð hann markakóngur. Ekki hefur gengið eins vel í Lengjudeildinni.

Bjarni Ólafur kom einnig til Eyjamanna fyrir þessa leiktíð en óvíst er hvort að hinn 38 ára gamli Bjarni spili fótbolta á næstu leiktíð.

Eyjamenn hafa valdið vonbrigðum í Lengjudeildinni. Þeir eru í 6. sæti, tólf stigum á eftir Leikni sem er í öðru sætinu, en tvö efstu liðin fara upp.

Síðustu tveir leikir liðsins í Lengjudeildinni eru gegn Leikni Fáskrúðsfirði á útivelli og Fram á heimavelli, þann 14. nóvember.

Liðið er þó komið í undanúrslit Mjólkurbikarsins en óvíst er hvenær sú keppni fer fram.