Helgi Valur ætlar að sanna að allt er fertugum fært

Helgi Valur Daníelsson, fyrrum atvinnu- og landsliðsmaður í knattspyrnu, skrifaði í dag undir eins árs samning við uppeldisfélag sitt Fylki. Helgi Valur hefur verið frá eftir að hafa meiðst illa í leik gegn Gróttu fyrr í sumar en hefur nú ákveðið að taka slaginn með Fylki í Pepsi Max deildinni næsta sumar.

Frá þessu greindi Fylkir á samfélagsmiðlum sínum í dag. 

Hinn 39 ára gamli Helgi Valur mun fagna fertugsafmæli sínu næsta sumar er deildin ætti að vera í hvað hæstum hæðum.

Fyrir tímabilið í ár ræddi Vísi við Helga Val enda var hann elsti útileikmaður deildarinnar. Hann hafði verið hættur í þrjú ár og vann við nýja jáeindaskannann á Landspítalanum þegar hann ákvað allt í einu að taka fram skóna með Fylki fyrir sumarið 2018. Var hann alger lykilmaður í liði Fylkis sumarið 2018 sem og í sumar eða allt fram að meiðslunum. Var hann til að mynda valinn í lið ársins hjá Pepsi Max Mörkunum og valinn besti leikmaður Fylkis síðasta sumar.

„Það hefur verið frábært að fylgjast með Helga eftir að hann kom aftur í Fylki fyrir tímabilið 2018. Hann átti frábært tímabil [20 leikir, fjögur mörk] og byrjaði þetta tímabil vel en meiddist svo illa snemma móts þegar hann fjórbrotnaði á fæti og spilaði því aðeins þrjá leiki í Pepsi Max deildinni þetta árið,“ sagir í tilkynningu Fylkis.

Helgi Valur hefur þar með blásið á spár flestra sem héldu að hann myndi leggja skóna á hilluna eftir meiðslin. Var hann farinn að æfa að nýju með Fylki áður en Íslandsmótið var blásið af nú á dögunum. Þar endaði Fylkir í 6. sæti.

Eru þetta gleðitíðindi fyrir Fylkismenn en Ólafur Ingi Skúlason, einn af miðjumönnum liðsins, sagði að hann væri svo gott sem búinn að leggja skóna á hilluna í viðtali nýverið. Fylkir heldur því allavega öðrum af reynslumeiri leikmönnum liðsins fyrir næstu leiktið.