Anníe Mist Þórisdóttir er með góð ráð fyrir þá sem þurfa að takast á við mótbyr á leið sinni til baka í sitt besta form.
Íslenska CrossFit konan Anníe Mist Þórisdóttir er komin með þriggja mánaða reynslu af endurkomu sinni eftir barnsburð og hún heldur áfram að miðla sinni upplifun af því að koma líkamanum sínum aftur af stað.
Þjálfun hugans er ekki síður mikilvæg fyrir íþróttafólk en að þjálfa upp líkamann. Anníe Mist fjallar um mikilvægi þess að vera með réttan hugsunarhátt þegar reynir á.
Nýjasti pistill Anníe Mistar snýr nefnilega af því hvernig er best að horfa á það þegar hlutirnir ganga ekki alveg eins hratt og vel og búist var við.
„Þegar þú mætir mótlæti, hvað sem það kann að vera, þá hefur þú það val um það hvernig þú bregst við,“ skrifaði Anníe Mist Þórisdóttir.
Hún eignaðist Freyju Mist 10. ágúst síðastliðinn og stelpan var þriggja mánaða í gær. Markmiðið er að taka þátt í næsta CrossFit tímabili að fullum krafti en The Open hefst í lok febrúar.
„Í mínu tilfelli þá gæti ég auðveldlega verið pirruð yfir öllu því sem líkaminn ræður ekki ennþá við en ég ákvað að einblína frekar á það sem ég get gert,“ skrifaði Anníe Mist.
„Þú verður að taka meðvitaða ákvörðun um að gera það á hverjum degi og sumir dagar eru vissulega erfiðari en aðrir. Með tímanum og með því að einbeita sér að rétta hugsunarhættinum, þá mun hugur þinn eiga auðveldara með að ná þessari niðurstöðu. Mannfólkið er vanafast og sérstök hegðun, bæði líkamleg og andleg, verður ekki að vana eftir aðeins eina nótt,“ skrifaði Anníe Mist.
„Lítum á hvern dag sem æfingu, æfingu til að þjálfa upp huga þinn gegn þessu mótlæti svo þegar erfiðu dagarnir renna upp þá verður þú klár í þær áskoranir sem bíða þin,“ skrifaði Anníe Mist eins og sjá má hér fyrir neðan.
