Veðurstofa Íslands hefur gefið út gula viðvörun á Suðurlandi vegna austan hvassviðris eða storms sem spáð er undir Eyjafjöllum. Viðvörunin gildir frá klukkan 11 í dag til klukkan 17 og er eftirfarandi:
„Austan 18-23 m/s undir Eyjafjöllum með hviðum um 35 m/s, en hægari vindur annars staðar á spásvæðinu. Getur verið varsamt fyrir ökutæki sem eru viðkvæm fyrir vindi.“
Annars staðar á landinu er spáð austan strekkingi eða allhvössum vindi í dag og rigningu í öllum landshlutum og það talsverðri á suðaustanverðu landinu.
Í kvöld og nótt á svo að draga úr vindi og úrkomu en norðaustanátt verður vaxandi með slyddu og snjókomu á Vestfjörðum.
„Austlæg átt með rigningu suðaustantil á morgun, en snýst í norðanátt með snjókomu á norðurhelmingi landsins. Um helgina er síðan útlit fyrir kaldan norðaustlægan vind með éljum norðantil, en bjart með köflum syðra,“ segir í hugleiðingum veðurfræðings á vef Veðurstofu Íslands.
Veðurhorfur á landinu:
Vaxandi austanátt, 13-20 m/s í dag, en allt að 23 m/s syðst. Víða rigning, talsverð rigning um landið suðaustanvert. Hægari vindur og þurrt norðanlands fram eftir degi. Lægir sunnantil á landinu í kvöld og dregur úr úrkomu. Hlýnandi, hiti 1 til 6 stig síðdegis.
Austlæg átt, 5-13 m/s og rigning með köflum suðaustan- og austanlands í fyrramálið, en norðan 10-18 vestast og slydda eða snjókoma á Vestfjörðum. Snýst í norðan 5-13 eftir hádegi með slyddu eða snjókomu norðantil, en léttir heldur til um landið sunnanvert. Hiti 0 til 6 stig.
Á föstudag:
Norðan 10-15 m/s vestast á landinu, annars hægari austlæg átt. Slydda eða snjókoma á Vestfjörðum, rigning með köflum norðan- og austanlands, en annars þurrt að kalla. Hiti 0 til 6 stig.
Á laugardag:
Norðlæg eða breytileg átt, 5-10 m/s. Skýjað að mestu, en dálítil él með norðurströndinnni. Hiti 0 til 5 stig og vægt frost inn til landsins.
Á sunnudag:
Norðaustan og austanátt 5-13 m/s, en 10-15 á noðvestantil. Dálítil snjókoma á norðanverðu landinu, annars stöku skúr eða él. Hiti um og undir frostmarki.
Á mánudag:
Austanátt og norðaustanátt. Víða rigning um sunnanvert landið og hiti um eða rétt yfir frostmarki, en snjókoma með köflum norðantil og frost 1 til 4 stig.
