Fjölskyldan biður fólk um að hugsa sig tvisvar um áður en það setur sig í dómarasætið

„Frá þeim tíma sem við höfðum fyrst veður af því sem um ræðir höfum við tekið eindregna afstöðu með Ölmu Dögg, varðandi rétt hennar á því að neita samskiptum við hvern sem hún óskar, þar á meðal þann sem um ræðir. Við höfum ítrekað lagt áherslu á að hver einstaklingur hefur rétt á sinni friðhelgi einkalífs. Við höfum lagt mikið af mörkum til að svo megi vera í þessu tilfelli og höfum lagt áherslu á að tjá okkur ekki um þetta mál og ítrekað hvatt viðkomandi til þess að gera það ekki á opinberum vettvangi,“ segir í yfirlýsingunni.

Hefur mætt erfiðum áskorunum

Þá segir að viðkomandi hafi mætt erfiðum áskorunum í lífinu. Frá barnæsku hafi hann þurft að takast á við einelti og einmanaleika. „Úrræði eða inngrip til stuðnings fyrir slíkan dreng voru ekki til staðar og fyrir vikið hefur hann takmarkaða færni til félagslegra samskipta – líkt og raunin er í þessu tiltekna máli,“ segir enn fremur.

„Umræddur maður hefur viðurkennt gerðir sínar greiðlega en það þýðir þó ekki að hann hafi gerst sekur um allt sem hann hefur verið sakaður um opinberlega. Það skal áréttað að tilgangur okkar er ekki að réttlæta gjörðir umrædds manns með vísan í andlega erfiðleika hans, en þó er mikilvægt að standa vörð um rétt hans til að bregðast við athugasemdum sem um hann kunna að falla, einkum ef ekki er rétt með farið.“

Í yfirlýsingunni er ekki tekið fram hvaða atriði eru röng, en þess ber að geta að aðstandendur sendu frá sér yfirlýsinguna áður en þátturinn var sýndur á Stöð 2 og höfðu ekki upplýsingar um innihald eða atriði þáttarins.

Ítrekað leitað sér aðstoðar

„Það skal einnig tekið fram að umræddur maður hefur ítrekað leitað sér aðstoðar fagaðila í þeim tilgangi að fá rétta meðferð og stuðning í sínum erfiðleikum. Þrátt fyrir það hefur samfélagið sem hann býr í valið að hafna honum. Dómstóll götunnar hefur tekið einhliða afstöðu til málsins og útskúfað honum.“

Enn fremur segir að maðurinn hafi fengið „óteljandi skilaboð“ frá aðilum sem telji sig vera málsvarar Ölmu Daggar, þar sem honum hafi meðal annars verið hótað. Þá hafi hann verið nafngreindur á samfélagsmiðlum og úthúðað á íbúasíðu Akraness, sem hafi gert það að verkum að úrvinnsla málsins hafi reynst honum þungbær. Fyrir vikið glími maðurinn við alvarlega vanlíðan og sjálfsvígshugsanir.

Að lokum er ítrekað að fjölskyldan muni aldrei samþykkja eða afsaka atriði þar sem sannanlega halli á manninn. Áfram muni þau gera það sem þau geti til þess að Alma eða aðstandendur hennar verði ekki frá ónæði frá manninum. Hins vegar óski þau eftir því að fólk hugsi sig tvisvar um áður en fólk setji sig í dómarasætið.

Yfirlýsingin var send viku áður en þátturinn fór í loftið. Maðurinn sem um ræðir skrifar ekki undir hana en að sögn fjölskyldunnar gaf hann samþykki fyrir birtingu hennar. Yfirlýsinguna í heild má lesa hér fyrir neðan. 

Við, aðstandendur þess manns er rætt er um í viðtali við Ölmu Dögg Torfadóttur og aðstandendur hennar í þættinum Ofsóknir, óskum eftir að koma eftirfarandi á framfæri. Frá þeim tíma sem við höfðum fyrst veður af því sem um ræðir höfum við tekið eindregna afstöðu með Ölmu Dögg, varðandi rétt hennar á því að neita samskiptum við hvern sem hún óskar, þar á meðal þann sem um ræðir. 

Við höfum ítrekað lagt áherslu á að hver einstaklingur hefur rétt á sinni friðhelgi einkalífs. Við höfum lagt mikið af mörkum til að svo megi vera í þessu tilfelli og höfum lagt áherslu á að tjá okkur ekki um þetta mál og ítrekað hvatt viðkomandi til þess að gera það ekki á opinberum vettvangi. 

Í ljósi þess að Stöð 2 mun sýna þátt um þetta viðkvæma mál, viljum við árétta að um einhliða frásögn annars málsaðila er að ræða þar sem hvorki hefur verið rætt við aðstandendur mannsins né hann sjálfan. Hvorki umræddur aðili né aðstandendur hans hafa séð þáttinn. Vegna veikinda og andlegrar líðan viðkomandi, sjáum við okkur ekki annað fært en að koma ákveðnum upplýsingum á framfæri, því á öllum málum eru tvær hliðar. 

Maðurinn sem er til umfjöllunar hefur mætt erfiðum áskorunum í lífinu. Frá barnæsku hefur hann þurft að takast á við einelti og einmanaleika. Úrræði eða inngrip til stuðnings fyrir slíkan dreng voru ekki til staðar og fyrir vikið hefur hann takmarkaða færni til félagslegra samskipta - líkt og raunin er í þessu tiltekna máli. Vert er að taka fram að strax frá upphafi var það afdráttarlaus afstaða aðstandenda að láta orð Ölmu Daggar njóta alls vafa. Með frekari framvindu þessa máls hafa þó komið í ljós efnislegar staðreyndir sem ekki standast skoðun. 

Umræddur maður hefur viðurkennt gerðir sínar greiðlega en það þýðir þó ekki að hann hafi gerst sekur um allt sem hann hefur verið sakaður um opinberlega. Það skal áréttað að tilgangur okkar er ekki að réttlæta gjörðir umrædds manns með vísan í andlega erfiðleika hans, en þó er mikilvægt að standa vörð um rétt hans til að bregðast við athugasemdum sem um hann kunna að falla, einkum ef ekki er rétt með farið. Það skal einnig tekið fram að umræddur maður hefur ítrekað leitað sér aðstoðar fagaðila í þeim tilgangi að fá rétta meðferð og stuðning í sínum erfiðleikum. 

Þrátt fyrir það hefur samfélagið sem hann býr í valið að hafna honum. Dómstóll götunnar hefur tekið einhliða afstöðu til málsins og útskúfað honum. Viðkomandi hefur fengið óteljandi skilaboð frá aðilum sem telja sig vera málsvarar Ölmu Daggar. Honum hefur verið hótað lífláti og líkamsmeiðingum. Hann hefur auk þess orðið fyrir ofbeldi af hendi málsvara Ölmu Daggar með þeim afleiðingum að hann þurfti að leita til bráðamóttöku. Hann hefur verið nafngreindur á samfélagsmiðlum, úthúðað á íbúasíðu þess bæjarfélags sem hann býr í, hrakinn burt af skemmtunum og margt fleira. 

Viðhorf og viðbrögð samfélagsins, í bland við þær ásakanir sem á hann eru bornar, hafa gert það að verkum að úrvinnsla málsins hefur reynst honum þungbær, sérstaklega í ljósi þess að hluti þessara ásakana virðist vera ósannur. Fyrir vikið glímir umræddur maður við alvarlega vanlíðan og hefur ítrekað leitað á bráðamóttöku geðdeildar vegna alvarlegra sjálfsvígshugsana, vonleysis og uppgjafar sem rekja má til þessa máls. 

Við viljum ítreka að við höfum og munum aldrei samþykkja eða afsaka atriði þar sem sannanlega hallar á hann. Við munum áfram gera það sem við getum til að Alma Dögg eða aðstandendur hennar verði ekki fyrir ónæði frá honum. Á sama tíma óskum við eftir því að fólk hugsi sig tvisvar um áður en það ber upp á hann rangar sakir, eða setur sig í dómarasætið án þess að hafa í huga að sérhvert mál hefur margar hliðar og ólík sjónarhorn. Með vinsemd og virðingu, aðstandendur