Kavíar er nýja flugan sem þú þarft að prófa

Það er alltaf gaman að sýna nýjar flugur og svo ég tali ekki um að prófa nýjar flugur og sjá hvernig þær reynast.

Við höfum í þetta skiptið dottið niður á aldeilis flotta nýjung í hnýtingum og það er okkar tilfinning að þessi fluga gæti reynst fiskum nokkuð skeinuhætt. Það er veiðikonan Helga Gísladóttir sem á heiðurinn af þessari flugu sem ber nafn með rentu. Flugan heitir Kavíar og er hnýtt eins og lítil hrúga af hrognum. Það þekkja það eflaust margir vel frá því að hrognaveiði var leyfð hvað hrognin gátu verið skæð, sérstaklega í urriða og sjóbirting.

Eins og sést á meðfylgjandi mynd er þetta virkilega flott og veiðileg fluga en vígslan á henni hefur þegar farið fram og það með góðum árangri. "Ég á minningar af því að veiða með hrognum og vildi bara líkja eftir því" sagði Helga Gísladóttir höfundur flugunnar í samtali við Veiðivísi. "Fyrsti fiskurinn veiddist á fluguna í Þjórsá en það var 70 sjóbirtingur sem reif hana í sig og það er klárt mál að ég á eftir að prófa þessa flugu víðar á þessu vori". 

Við reiknum bara fastlega með því að Helga gefi sitt góðfúslega leyfi til að hnýta eftir flugunni en það gæti orðið nokkuð vandasamt verk því það er ekki auðvelt að hnýta hana en miðað við hvað við teljum að hún gæti orðið veiðin er það sjálfsagt minnsta mál að gefa sér tíma í það.