Bene­dikt Boga­son með 423 þúsund krónur á mánuði hjá HÍ

Karl Axelsson hæstaréttardómari er með mánaðarlaun hjá skólanum sem eru í samræmi við 20 prósenta dósentstöðu og nema þau liðlega 142 þúsund krónum á mánuði. 

Föst mánaðarlaun hjá Hæstarétti nema 2,207 milljónum króna

Í stjórnarfrumvarpi sem Bjarni Benediktsson fjármálaráðherra mælti fyrir á löggjafarþingi 2018-2019 segir um laun forseta Hæstaréttar að þau skuli 2.008.085 kr. á mánuði og þar af skal greiðsla fyrir yfirvinnu og álag sem starfinu fylgir nema 526.460 kr. á mánuði. Þessi tala hefur hækkað í samræmi við breytingu á launavísitölu opinberra starfsmanna og nú 2,207 milljónir króna.

„Laun varaforseta Hæstaréttar nema 1.891.910 kr. á mánuði og þar af skal greiðsla fyrir yfirvinnu og álag sem starfinu fylgir nema 459.456 kr. á mánuði. Laun annarra hæstaréttardómara nema 1.844.401 kr. á mánuði og þar af skal greiðsla fyrir yfirvinnu og álag sem starfinu fylgir nema 459.456 kr. á mánuði.“

Vísir sendi einnig fyrirspurn til HR en svar við henni hefur ekki borist en samkvæmt vef Hæstaréttar í hagsmunaskráningu sinnir Ólafur Börkur Þorvaldsson stundakennslu við skólann.

Rausnarleg laun dómara eru meðal annars hugsuð sem svo að þeir geti verið óháðir fjárhagslega og ekki útsettir fyrir mútum.

Vísir sagði um helgina af grein sem Jón Steinar Gunnlaugsson lögmaður og fyrrverandi hæstaréttardómari skrifaði en þar taldi hann það ekki forsvaranlegt að hæstaréttardómarar væru að sækja sér aukatekjur utan Hæstaréttar; á sínum tíma hugmyndin með millidómstigi verið sú að minnka álag á Hæstarétti svo dómar mættu vera vandaðir.

Ása og Björg að ljúka verkefnum fyrir skólann

Í svari við fyrirspurn Vísis segir í svörum frá Háskólanum að hæstaréttardómarar sem starfa við Lagadeild Háskóla Íslands, þau séu: Ása Ólafsdóttir prófessor í 15 prósenta starfshlutfalli tímabundið, sem tengjast starfslokum hennar í nóvember 2020 og Björg Thorarensen prófessor er í 25% hlutfalli tímabundiðtengdum starfslokum hennar í nóvember 2020. Þær séu í raun að ljúka verkefnum sem þau höfðu tekist á hendur áður en þær voru skipaðar dómarar við réttinn.

En Jón Steinar gagnrýnir ekki aðeins það að hæstaréttardómarar séu að sækja sér aukagetu heldur vill hann meina að þetta geti komið niður á óhæði réttarins.

„Það er líka ekki boðlegt það bandalag sem myndast með þessum hætti milli lagadeildar HÍ og réttarins. Deildin hefur því hlutverki að gegna að fjalla með gagnrýnum hætti um dómaframkvæmd í landinu. En þarna eru allir vinir. Þeir gefa út heiðursrit hinum til vegsemdar og sitja saman í nefndum, sem fara með veigamikil völd í dómskerfinu, t.d. við að meta hæfni dómaraefna. Augljós dæmi eru fyrir hendi um misnotkun á þessu síðastnefnda valdi,“ skrifar Jón Steinar meðal annars í pistli sínum.

Sitt sýnist hverjum

Vísir hefur rætt við fyrrverandi laganema sem telja það mikilvægt að akademían sé í tengslum við praxísinn, þannig að á þessu máli eru ýmsir fletir. Nokkur umræða hefur sprottið upp í samfélaginu vegna þessara skrifa Jóns Steinars. Þannig segist Andrés Jónsson almannatengill á sinni Twittersíðu að þetta góð ábendingu hjá Jóni Steinari með aukastörf hæstaréttardómara. „Fáar stéttir sem njóta jafn góðra kjara og þau, m.a. til að tryggja óhæði þeirra.“ 

Í athugasemd þar við segir Bjarni Már Magnússon prófessor við Háskólann í Reykjavík að svo virðist sem nokkrir kærleikar, eða sérstakt samband sé, milli Háskóla Íslands og Hæstaréttar. Hann tengir við færslu rektors þar sem myndin sem er við þessa frétt er birt.

Bjarni Már bendir jafnframt og meðal annars á grein sem birtist í Kjarnanum í fyrra þar sem fjallað er um aukastörf dómara sem mörgum þykja óeðlileg.

Sveinn Andri Sveinsson hæstaréttarlögmaður telur hins vegar Jón Steinar vera beran af tvískinnungi, að hætti hússins. Sveinn bendir á að árið 2004, þegar Jón Steinar var nýskipaður við Hæstarétt, hafi hann sjálfur svarað spurningu um það hvort hann vildi halda áfram kennslu við HR á þann hátt að það væri óvíst. En hann hefði áhuga á að gera það. Ef hann komi því við, tímans vegna. En 2021 hafi honum snúist hugur og saki nú dómara um að sjá sér leik á borði, þegar álagið í Hæstarétti minnkaði, að taka að sér vel launuð aukastörf, eins og við kennslu í háskólanum.:

Undanfarin ár hefur Hæstiréttur tilnefnt 33 starfsmenn lagadeildar Háskóla Íslands til einhverra starfa, sjö starfsmenn lagadeildar Háskólans í Reykjavík, enga frá Háskólanum á Akureyri eða Bifröst. Þetta kemur fram í svari dómsmálaráðherra við fyrirspurn Andrésar Jónssonar Pírötum.

Uppfært 15:50

Þegar laun Benedikts við Hæstarétt voru tilgreind var vitnað til stjórnarfrumvarps sem Bjarni Benediktsson fjármálaráðherra mælti fyrir á löggjafarþingi 2018-2019, að laun forseta Hæstaréttar að þau skuli 2.008.085 kr. á mánuði og þar af skal greiðsla fyrir yfirvinnu og álag sem starfinu fylgir nema 526.460 kr. á mánuði. Mistök urðu við vinnslu fréttarinnar og greiðsla fyrir yfirvinnu og álag voru lögð saman þegar hún er hluti heildargreiðslu. Rétt tala er, uppfærð að teknu tilliti til árlegrar hækkunar: 2,207 milljónir króna. Hefur fréttin verið uppfærð að teknu tilliti til þessa og beðist velvirðingar á mistökunum.