Rólegur júní í laxveiðinni með einni undantekningu

Á þessu er ein undantekning, kannski tvær. Urriðafoss er að detta í 400 laxa og ber höfuð og herðar yfir árnar þegar það eru teknar saman veiðitölur. En við skulum samt aðeins róa okkur á svartsýninni þar sem langflestar árnar eru bara ný opnaðar, sem og að kalt vor og köld byrjun á sumri hefur oftar en ekki gert það að verkum að veiðin fer seint í gang.

Það eru helst veiðitölur úr Blöndu og Norðurá sem vekja furðu en þegar tölur voru teknar saman hjá Landssambandi Veiðifélaga að venju á miðvikudaginn var aðeins búið að bóka 22 laxa í Blöndu og 65 laxa í Norðurá. Það þarf ekkert að fela það að þetta er afskaplega róleg byrjun í þessum tveimur ám sem opna fyrstar og eru af þeim sökum yfirleitt að sýna mun hærri tölur á þessum tíma. 

Stórstreymi er nýafstaðið og skilaði minna í árnar en væntingar stóðu til en svo við nefnum aftur, þetta er ekki einsdæmi á köldu vori! Aðdragandi næsta straums og sá straumur rétt fyrir miðjan júlí er aðalstraumurinn á þessu ári segja reynsluboltarnir og taka þá mið af aðstæðum þar sem kalt vor, kaldar og vatnsmiklar ár hafa þessi áhrif.