Bræður börðust hlið við hlið | Myndir

Ísland tók á móti Grikklandi í öðrum leik undankeppninnar í Lautinni í Árbæ. Eftir 2-1 sigur gegn Hvíta-Rússlandi ytra var ljóst að bæði lið gætu náð toppsæti riðilsins - tímabundið - en Grikkir höfðu leikið einum leik meira en íslenska liðið.

Fór það svo að leik gærdagsins lauk með 1-1 jafntefli og Ísland því með fjögur stig að loknum tveimur leikjum. Annan leikinn í röð léku bræðurnir Kristian Nökkvi Hlynsson og Ágúst Eðvald Hlynsson síðari hluta síðari hálfleiks saman í liði Íslands.

Kristian Nökkvi hóf leikinn en hann er yngsti leikmaður liðsins, fæddur árið 2004. Líkt og gegn Hvíta-Rússlandi spilaði hann allan leikinn. Ágúst Eðvald, fæddur 2000, kom inn af bekknum á 67. mínútu leiksins í gær en hann kom inn á svipuðum tíma gegn Hvíta-Rússlandi.

Kristian Nökkvi leikur með B-liði Ajax í B-deildinni í Hollandi á meðan Ágúst Eðvald er á mála hjá AC Horsens í dönsku B-deildinni.

Hér að neðan má sjá myndir sem Bára Dröfn Kristinsdóttir, ljósmyndari Vísis, tók á leiknum sem og nokkrar aðsendar af þeim bræðrum.