Viðskipti innlent

Loðnutekjur af Íslandsmiðum redda grænlenskum flugvelli

Kristján Már Unnarsson skrifar
Grænlenska skipið Polar Amaroq á loðnumiðunum í norðanverðum Faxaflóa á síðustu vertíð. Myndin er tekin um borð í Beiti NK.
Grænlenska skipið Polar Amaroq á loðnumiðunum í norðanverðum Faxaflóa á síðustu vertíð. Myndin er tekin um borð í Beiti NK. KMU

Væntanlegur loðnugróði Grænlendinga af Íslandsmiðum veldur því að íbúar stærsta bæjar Suður-Grænlands fá loksins nýjan flugvöll. Þar var tíðindunum fagnað með söng og flugeldasýningu á dögunum.

Fjallað var um málið í fréttum Stöðvar 2 en um þrjúþúsund manns búa í bænum Qaqortoq. Til að komast í flug þurfa íbúarnir að sigla í tvo klukkutíma til Narsarsuaq sem núna er aðalflugvöllur Suður-Grænlands. Beint áætlunarflug er þangað frá Reykjavík á sumrin.

Flugvallaframkvæmdir eru á fullu í Nuuk og Ilulissat en Qaqortoq hefur beðið vegna fjárskorts.Stöð 2/Google Earth.

Nýr flugvöllur við Qaqortoq átti raunar að vera þriðja stóra flugvallarverkefni Grænlendinga um þessar mundir. En meðan framkvæmdir í Ilulissat og Nuuk eru á fullu hefur fjárskortur hamlað því að hægt yrði að hefjast handa í Qaqortoq, - allt þar til nú að grænlensku stjórnarflokkarnir tilkynntu við fjárlagagerð landsstjórnarinnar að þeir væru búnir að finna andvirði níu milljarða íslenskra króna í verkið.

Teikning af fyrirhugðum flugvelli í Qaqortoq, stærsta bæ Suður-Grænlands.Kalaallit Airports

Fréttamiðillinn KNR greinir frá því að íbúar Qaqortoq hafi skotið flugeldum á loft og sungið af gleði þegar þeir fengu fregnirnar. Skýringarnar sem grænlensk stjórnvöld gefa á þessum óvæntu viðbótartekjum eru einkum loðnugróði, sem allur kemur af Íslandsmiðum um þessar mundir.

Grænlendingar eiga rétt á tuttugu prósentum kvótans, eða um 180 þúsund tonnum á yfirstandandi vertíð, sem gæti skilað tólf milljarða króna verðmæti. Polar Amaroq er annað af tveimur skipum Grænlendinga sem veiða loðnuna hér við land en útgerðin er að þriðjungi í eigu Síldarvinnslunnar og með íslenska yfirmenn um borð. Hitt skipið er Tasiilaq, en útgerð þess er að þriðjungi í eigu Ísfélags Vestmannaeyja.

Fyrirhugaður flugvöllur við Qaqortoq, samkvæmt teikningu frá flugvallafélagi Grænlands, Kalaallit Airports.Mynd/Kalaallit Airports.

Grænlensku skipin munu þó aðeins veiða um þriðjung grænlenska kvótans, að mati Gunnþórs Ingvasonar hjá Síldarvinnslunni. Hann áætlar að stærsti hluti loðnutekna Grænlendinga muni koma í gegnum kvótaleigu til Evrópusambandsins, sem noti loðnukvótana svo í skiptisamningum við Norðmenn.

En þökk sé væntingum um góða loðnuvertíð við Ísland í vetur, þá stefnir flugvallafélag Grænlendinga núna á að hefja framkvæmdir við 1.500 metra flugbraut í Qaqortoq strax í sumar, að því er talsmaður Kalaallit Airports greinir frá. Áform um að spara með því að leggja styttri braut og reisa minni flugstöð hafa verið dregin til baka.

Hér má sjá frétt Stöðvar 2:

Loðnuveiðar Sjávarútvegur Fréttir af flugi Grænland

Tengdar fréttir

Flugvöllum seinkar og sá þriðji líklega styttur

Bakslag er komið í flugvallaframkvæmdirnar á Grænlandi, stærstu innviðauppbyggingu í sögu landsins. Tilkynnt hefur verið um ársseinkun á völlunum í Nuuk og Ilulissat á sama tíma og horfur eru á að þriðji flugvöllurinn, í Qaqortoq, verði minnkaður í sparnaðarskyni.

Fyrstu loðnunni landað á Íslandi eftir þriggja ára hlé

Grænlenska skipið Polar Amaroq landaði tæplega 700 tonnum af frystri loðnu á Eskifirði um helgina. Þessi loðnulöndun markar tímamót því hún er sú fyrsta hér á landi í tæplega þrjú ár. Loðnan veiddist úr kvóta Grænlendinga á Íslandsmiðum.

Grænlendingar semja um hærri greiðslur fyrir kvóta

Grænlendingar hafa endurnýjað samninga við Evrópusambandið sem tryggja þeim andvirði þriggja milljarða íslenskra króna í árlegar tekjur af fiskveiðiheimildum í lögsögu Grænlands. Fyrirtæki í eigu Íslendinga er meðal þeirra sem nýta kvótana.



Mest lesið


Fleiri fréttir

Sjá meira


×

Mest lesið