Listamannalaunin hækka um 80 þúsund krónur á árinu

Frá þessu er greint í Fréttablaðinu í dag. Þar segir að listamannalaunin séu í dag 428.420 krónur en í fyrra voru þau 409.580 krónur. Vegna hins aukna framlags í launasjóðinn munu þeir sem fá úthlutað fá 490.920 krónur og nemur heildarhækkunin á árinu þannig 80 þúsund krónum.

„Þetta er ekki að mínu mati há tala og við stefnum að því á þessu kjörtímabili að þetta hækki nú í nokkrum skrefum,“ hefur Fréttablaðið eftir ráðherra, Lilju Dögg Alfreðsdóttur. „Af því ég tel að það sé mikilvægt fyrir listafólkið okkar og þetta kerfi hefur reynst mjög vel. Ríkisstjórnin er öll, myndi ég segja, á þessari línu, að styðja betur við þetta kerfi.“