Að halda fókus á ráðstefnum og fundum

Við dettum út og förum að hugsa um eitthvað allt, allt annað.

Gleymum okkur í símanum eða á netvafri.

Finnum fyrir þreytu.

Hér eru nokkur góð ráð til að hjálpa okkur með einbeitinguna.

1. Sofðu vel nóttina á undan. Þetta á auðvitað við um alla daga en er sérstaklega gott að hafa í huga, ef ætlunin er að vera einbeitt á fundi, námskeiði, ráðstefnu eða fundi daginn eftir.
2. Vertu búin/n að borða eitthvað. Að finna til svengdar gerir okkur erfiðara fyrir að halda fókus.
3. Komdu blóðrásinni af stað áður en fundurinn eða viðburðurinn hefst. Þetta þarf ekkert endilega að þýða klukkutíma í ræktinni eða langur göngutúr því það að teygja vel úr sér og hreyfa vel útlimi, hrista sig, dansa, hoppa hjálpar. Auðvelt að gera þetta inni á baðherbergi án þess að nokkur sjái eða áður en haldið er af stað.
4. Ef þú keyrir á viðburðinn er upplagt að hlusta á skemmtilega tónlist á leiðinni. Ef viðburðurinn er rafrænn er hægt að gera þetta heima fyrir eða í vinnunni. Nokkrar mínútur gera kraftaverk.
5. Á ráðstefnum eða málþingum getum við búið okkur til hlutverk með því að nota skeiðklukkuna í símanum okkar og taka tímann á hverjum dagskrárlið.
6. Skrifaðu niður nokkrar spurningar á blað um það sem þig langar að vita eða ert að gera þér vonir um að geta spurt um eða fá svör við.
7. Vertu með blað og penna til að glósa eða hreinlega krota á. Þótt það sé bara krass eða Óli prik.
8. Brostu og stilltu hugann inn á jákvæðnina áður en viðburðurinn eða fundurinn hefst.
9. Settu þér markmið um að súmmera það helsta á blað eftir hvern dagskrárlið fyrir þig. Þó ekki nema eitt atriði sem þér fannst standa uppúr á fundinum, vera athyglisvert, eitthvað sem þú ætlar að kanna betur, muna eftir viðburðinn/fundinn.