Í fréttum Stöðvar 2 og í þættinum Um land allt hittum við mæðginin Helenu Lind Svansdóttur og Alex Birgisson. Þau komu sem ferðamenn til að njóta orlofsdvalar en Mjóifjörður er hálft árið án vegasambands og einu samgöngurnar þá á sjó með ferju tvisvar í viku.
-Hvað er sautján ára gutti að gera í Mjóafirði um hávetur?
„Ég er bara búinn að vera að vinna mikið í covid og átti góðan frítíma, vildi tæma hugann og fara í sjósund, fara í fjallgöngur og sjá fallegan Mjóafjörð og tjilla.“
-Ertu að synda hérna?
„Já. Mamma er meira í því. En ég fór í gær og það var ekki eins kalt og maður hélt,“ svarar Alex, sem dvaldi hluta tímans með móður sinni.
„Já, já, hérna er bara paradís og hérna syndi ég á hverjum degi. Það er ekki hægt að hafa þetta nær,“ segir Helena Lind um leið og hún bendir á sjóinn og síðan á húsið við fjöruborðið sem afi hennar byggði og er núna ættaróðal fjölskyldunnar.
Við nefnum að við sáum sel rétt áðan stinga upp höfðinu á þeim slóðum þar sem hún syndir.
„Já, þeir eru hérna. Ég hitti þá. Þeir hafa verið rétt hjá þegar ég hef verið að synda. En svo þegar ég er að labba hérna þá hitti ég þá líka,“ en þau mæðginin segjast einnig hafa nýtt tímann mikið til gönguferða.
Ferðalag þeirra að sunnan hófst á flugi til Egilsstaða, síðan var það rúta í Neskaupstað og loks bátsferð í Mjóafjörð.
„Já, báturinn er tvisvar í viku þannig að þú þarft að plana innkaupin vel. Maður einhvern veginn aðlagast ýmsu og mér fannst þetta ekkert erfitt,“ segir Helena.
Ljósleiðari er nýlega kominn í Mjóafjörð en ungi maðurinn segist ekki liggja á internetinu.
„Maður er náttúrlega með það. En ég labba, hlusta á tónlist og tjilla. Bara að njóta þess að horfa. Í hvaða átt sem þú horfir, þú sérð svo fallega hluti. Þetta er fallegur fjörður,“ segir Alex.
„Bara alger paradís. Að kúpla sig út úr borginni og finna kjarnann í sjálfum sér. Ég held að þetta sé einn af bestu stöðunum til að gera það,“ segir Helena Lind.
Ítarlegra viðtal við þau mæðginin er í þættinum Um land allt, sem nálgast má á streymisveitunni Stöð 2+. Þátturinn er jafnframt endursýndur á Stöð 2 í dag, sunnudag, klukkan 14.15.
Hér má sjá frétt Stöðvar 2:
Hér má sjá sýnishorn úr næsta þætti:
