Í gegnum tíðina hefur aðferðafræðin við veiðar á sjóbirtingi tekið nokkrum stakkaskiptum en nú er að langmestu leiti aðeins veitt á flugu og sífellt fleiri veiðisvæði hafa sett sleppiskyldu, sérstaklega á vorfiski. Veiðimenn hafa flestir tekið þessu fagnandi enda hefur það sýnt sig og sannað á þeim veiðisvæðum sem voru fyrst að taka þetta upp að þar hefur birtingurinn bara stækkað.
En að sama skapi með breyttri umgengni við sjóbirtinginn þá hefur líka orðið nokkur breyting á þeim flugum sem eru mest notaðar og eins hafa aðferðir sem fáum hefði dottið í hug að virki á sjóbirting vaxið í vinsældum. Ein þeirra er að nota þurrflugur við veiðarnar. Það er um að gera að prófa þetta því eins og fluguveiðimenn vita er fátt eins skemmtilegt og að setja í fisk á þurrflugu. Valið á flugunni fer auðvitað mikið eftir aðstæðum en ætli meginreglan sé ekki sú að í tæru vatni sé ágætt að byrja á litlum flugum en í skoluðu vatni hefur til að mynda Bomber virkað vel. Sjóbirtingur er í eðli sínu mjög gráðugur fiskur og ætli hann sér í fluguna kemur hann jafnvel úr töluverði dýpi til að sækja hana.
Ég held að það sé ekki spurning fyrir þá sem eru farnir að fara í gegnum veiðidótið og plana fyrstu túrana í vorveiðinni að taka þurrfluguboxið með, þó það sé ekki nema til að gefa því tækifæri.
