Norð­austan átt og sums staðar rigning sunnan­til

Á vef Veðurstofunnar segir að eftir hádegi snúist vindurinn smám saman í suðaustanátt og bæti í rigningu sunnan- og vestanlands en styttir upp fyrir austan. Hiti verður í kringum frostmark norðantil á landinu, en allt að 7 stiga hiti sunnanlands.

„Suðvestan 5-10 á morgun en 10-18 norðantil. Dregur úr úrkomu í fyrramálið. Hiti 1 til 7 stig. Snýst í norðlæga átt og kólnar seinnipartinn með éljum um landið norðanvert og rofar til sunnan heiða. Víða vægt frost seint annað kvöld,“ segir í hugleiðingum veðurfræðings.

Veðurhorfur á landinu næstu daga

Á fimmtudag: Suðvestan 8-15 m/s og rigning eða slydda með köflum, en þurrt á Austurlandi. Hiti 1 til 7 stig. Norðlægari og kólnar seinnipartinn með snjókomu á norðanverðu landinu, en rofar til sunnanlands.

Á föstudag: Snýst í austan og suðaustan 8-13, en 13-18 með suðurströndinni. Rigning eða slydda sunnan- og vestantil á landinu og snjókoma í uppsveitum, hiti 0 til 4 stig. Þurrt og bjart norðaustanlands með frosti að 7 stigum.

Á laugardag: Sunnan og suðvestan 5-10 og rigning eða súld í flestum landshlutum en úrkomuminna norðan- og austanlands síðdegis. Hiti 2 til 7 stig.

Á sunnudag: Breytileg átt og væta á sunnanverðu landinu með hita að 7 stigum, en dálítil slydda eða snjókoma norðantil og hiti um eða undir frostmarki.

Á mánudag og þriðjudag: Austlæg átt. Skýjað á landinu og lítilsháttar rigning eða snjókoma á víð og dreif. Vægt frost fyrir norðan, en frostlaust sunnanlands.