Í byrjun apríl voru 55.982 erlendir ríkisborgarar skráðir með fasta búsetu á Íslandi eða um fimmtán prósent þeirra sem búa á Íslandi. Þetta kemur fram í tilkynningu frá Þjóðskrá.
Erlendum ríkisborgurum hér á landi fjölgaði um rúmlega eitt þúsund á fjórum mánuðum. Mest er fjölgunin hjá fólki með úkraínskt ríkisfang en hún var ríflega 90% á þessum mánuðum.
Þá var einnig umtalsverð fjölgun ríkisborgara frá Venesúela eða um 40%. Nú eru 640 einstaklingar með venesúelskt ríkisfang búsettir hér á landi.
Pólskum ríkisborgurum fjölgaði á ofangreindu tímabili um 92 en um síðustu mánaðamót voru þeir 21.283 á Íslandi.
Íslendingar fjölga sér ekki nóg um fyrirsjáanlega framtíð til að anna eftirspurn eftir vinnuafli á öllu sviðum samfélagsins. Erlendum íbúum hefur fjölgað mikið á undanförnum árum til að bæta þetta upp og hlutfall þeirra af mannfjölda landsins á eftir að aukast hratt á næstu árum.
