Jókerinn enn á lífi en Pelíkanarnir jöfnuðu á móti efsta liðinu

NBA-meistarar Milwaukee Bucks og Miami Heat komust bæði í 3-1 í sínum einvígum eftir útisigra en New Orleans Pelicans tókst aftur á móti að jafna metin í 2-2 á móti Phoenix Suns sem var með langbesta árangurinn í deildarkeppninni.

Í Austurdeildinni eru liðin með örugga forystu en þetta er mun jafnara í Vesturdeildinni þar sem þrjú einvígi standa nú jöfn eftir fjóra fyrstu leikina.

Nikola Jokic var með 37 stig, 8 fráköst og 6 stoðsendingar þegar Denver Nuggets vann 126-121 á heimavelli sínum á móti Golden State Warriors og minnkaði muninn í 3-1. Ekkert lið hefur komið til baka úr stöðunni 0-3 en Denver lét að minnsta kosti ekki sópa sér í sumarfrí.

Jokic átti líka stoðsendinguna á Will Barton í þriggja stiga körfu 8,3 sekúndum fyrir leikslok sem innsiglaði sigurinn. Staðan var 121-121 eftir að Golden State hafði elt nær allan leikinn en Austin Rivers stal þá sendingu Otto Porter Jr. og Monte Morris kom Denver tveimur stigum yfir. Þriggja stiga karfan kom muninum síðan í fimm stig.

Monte Morris skoraði 22 stig fyrir Denver þar af skoraði hann fimm þriggja stiga körfur í þriðja leikhlutanum. Aaron Gordon var með 21 stig og gerði einnig vel í vörninni að halda Jordan Poole í 11 stigum en Poole var með 28,7 stig í leik í fyrstu þremur leikjunum.

Steph Curry skoraði 33 stig fyrir Golden State en klikkaði á 13 af 23 skotum sínum. Hann klikkaði líka á fjórum vítaskotum í fyrsta sinn á ferlinum. Klay Thompson var með 32 stig og Andrew Wiggins skoraði 20 stig.

Brandon Ingram skoraði 16 af 30 stigum sínum í þriðja leikhlutanum þegar New Orleans Pelicans vann 118-103 sigur á Phoenix Suns og jafnaði einvígið í 2-2. Phoenix lék án Devin Booker sem er meiddur og munar mikið um það endaði skoraði hann 31 stig í leik tvö.

Litháinn Jonas Valanciunas var neð 26 stig og 15 fráköst hjá Pelíkönunum en Deandre Ayton var atkvæðamestur hjá Suns með 23 stig og 8 fráköst og JaVale McGee skoraði 14 stig. Chris Paul var aftur á móti aðeins með 4 stig á 35 mínútum.

Milwaukee Bucks og Miami Heat eru bæði komin í 3-1 eftir flotta útisigra í nótt.

Giannis Antetokounmpo var með 32 stig, 17 fráköst og 7 stoðsendingar þegar Milwaukee Bucks vann 119-95 útisigur á Chicago Bulls en Grayson Allen setti líka persónulegt met í úrslitakeppni með því að skora 27 stig. Jrue Holiday var síðan með 26 stig en hjá Bulls var Zach LaVine atkvæðamestur með 24 stig og 13 stoðsendingar en DeMar DeRozan skoraði 23 stig.

Frammistaða Allen, sem hefur hitt úr 11 af 14 þriggja stiga skotum í síðustu tveimur leikjum, er mjög mikilvæg því Bucks er án Khris Middleton sem meiddist á hné í leik tvö og verður líklegast ekkert meira með í einvíginu.

Jimmy Butler skoraði 13 af 36 stigum sínum í öðrum leikhluta þegar Miami Heat vann 110-86 útisigur á Atlanta Hawks en Heat liðið vann þennan ráðandi annan leikhluta 30-15. Miami vann þenann örugga sigur þrátt fyrir að leika án Kyle Lowry.

De'Andre Hunter var stigahæstur hjá Atlanta Hawks með 24 stig en Miami tókst að halda Trae Young í 9 stigum og 5 stoðsendingum.