Rúnar Ingi: Ég er ekki að fara neitt

„Ég er svo ógeðslega stoltur af þessum stelpum, þvílíkir töffarar og sérstaklega í fyrri hálfleik. Við gerðum þetta alveg eins og við vorum búnar að tala um. Við þurftum að gera þetta af svona smá ljótum leðjuslag. Við höldum þeim í fáránlega lágum stigafjölda í dag og við erum Íslandsmeistarar,“ sagði Rúnar með stórt bros á vör í viðtali við Vísi eftir leik.

Rúnar hefur gert frábæra hluti með nýliða Njarðvíkur og lýkur tímabilinu með því að lyfta þeim stóra. Njarðvík átti ekki einu sinni að vera í deildinni í ár en liðið tapaði fyrir Grindavík í úrslitaleik í umspili um sæti í efstu deild á síðasta tímabili. Njarðvík fékk sæti í efstu deild eftir að Snæfell dróg lið sitt úr keppni.

Rúnar hefur því verið orðaður við hin ýmsu störf hjá öðrum liðum undanfarið en Rúnar dróg allan vafa af því að hann væri að fara að stýra einhverju öðru liði á næsta tímabili.

„Maður getur ekkert hætt núna. Ég viðurkenni að ég varð smá þreyttur á þessu í vetur en ég þjálfa bara í Njarðvík og ég er ekki að fara neitt. Ég hlakka til að fá að verja titilinn,“ svaraði Rúnar aðspurður út í framtíðina.

Aliyah Collier var valinn mikilvægasti leikmaður úrslitakeppninnar. Collier setti stiga- og frákastamet í úrslitaviðureigninni en hún gerði 141 stig og tók 98 fráköst í leikjunum fimm.

„Það er ómetanlegt að atvinnumaðurinn í liðinu er sú sem leggur mest á sig alltaf og alla daga. Sama hvort það sé á mánudegi í nóvember eða á lokaleik í úrslitum. Svona leikmann vildi ég semja við og hún svaraði kallinu í allan vetur. Hún er besti leikmaðurinn í deildinni að mínu mati og heldur upp á það með því að lyfta titlinum,“ sagði Rúnar um frammistöðu Collier í vetur.