Ein mest krefjandi en skemmtilegsta veiði sem þú finnur

Vissilega eins og alltaf í veiði er heppni ákveðinn partur af þessu en það má ekki afskrifa reynslu. Veiðin í Minnivallalæk getur verið mjög fín og það fékk holl að reyna sem var við veiðar síðustu helgi en þá var 13 vænum urriðum landað í ánni. Algeng stærð er 60-70 sm en það sjást bæði minni og stærri fiskar.

Þetta er glertær á með fallegum veiðistöðum og lygnum breiðum inn á milli og það má alveg segja að þetta sé krefjandi veiði því styggur er hann blessaður urriðinn. Þarna þarftu að koma að ánni hljóðlega, passa skugga og veiða eins og þú sért að reyna vera ósýnilegur. Er þetta skemmtilegt að veiða svona? Ó já!

Þegar þú kemur að veiðistað þarna þegar veðrið er stillt, áin lygn og fluga að klekjast, skalltu ekki byrja að kasta strax heldur setjast niður og sjá hvort það sé uppítaka. Ef þú sérð uppítökur settu undir þurrflugu, svart í stærð #16-18, jafnvel #20. Taumurinn má ekki vera meira en 6 pund og það af fíngerðustu gerð. Ef það er ekki uppítaka settu litla púpu, smá þyngda en ekki alltaf nauðsyn, kastaðu andstreymis og veiddi allar litlar straumrennur sem þú sérð.

Þó svo að þú kannski lendir ekki oft í neinni mokveiði þarna þá er það sannarlega skilgreining á góðum veiðimanni að koma að hyl í Minnivallalæk, lesa hann rétt og ná vænum urriða úr honum. Ef þú styggir fiskinn í hylnum fer það ekkert framhjá þér því boðaföllin sjást um allt. Ef þú ert að veiða á björtum degi sérðu urriðann vel í ánni og marga af þessum 80-90 sm fiskum sem þarna er að finna.