Margir í hverfinu hafi vitað af ógnandi hegðun hins grunaða

Maðurinn sem lést var fæddur árið 1975 og lætur eftir sig fjögur börn. Hann hafði verið búsettur í Barðavogi í rúmt ár og bjó í sama húsi og sá sem var handtekinn á laugardagskvöld vegna gruns um morðið, og er sá fæddur árið 2001.

Lögregla hafði verið kölluð út að húsinu í tvígang sama dag og morðið átti sér stað en nágrannar lýstu þá ofbeldisfullri hegðun af hálfu hins grunaða. Þrátt fyrir þær tilkynningar var maðurinn ekki fjarlægður af heimilinu. 

Fyrrverandi nágranni lýsti því í kjölfarið að hinn grunaði hafi ítrekað viðhaft ógnandi tilburði og að mörgum hafi staðið stuggur af honum í lengri tíma. Þá hafi það verið ljóst að maðurinn þyrfti sértæk úrræði. 

Annar íbúi í hverfinu, sem vill ekki láta nafn síns getið, segir í samtali við fréttastofu að hinn grunaði hafi verið til vandræða um árabil, að margir í hverfinu hafi vitað af honum og óttast hann. 

Til að mynda hafi skapast umræða á samfélagsmiðlum um hann eftir að hann var sagður hafa ráðist á hunda í hverfinu. Úrræðaleysi hafi þó blasað við. 

Maðurinn hefur nú verið úrskurðaður í gæsluvarðhald til fyrsta júlí á grundvelli almannahagsmuna. Hann hefur ekki kært þann úrskurð samkvæmt upplýsingum frá lögreglu en frestur til þess er ekki liðinn. 

Lögregla vill ekki gefa það upp hvort hann hafi játað eða neitað sök. Þá gefa þau ekkert upp um mögulegt morðvopn eða dánarorsök, þá hvort maðurinn hafi verið barinn líkt og einhverjir fjölmiðlar greindu frá um helgina. 

Viðbúið er að rannsókn málsins muni taka einhverja mánuði. Búið er að ræða við helstu vitni og er verið að fara yfir þá vitnisburði, meðal annars með tilliti til atburðarrásar. Þá munu sérfræðingar framkvæma mat á hinum grunaða og réttarkrufning fara fram til að skera úr um dánarorsök hins látna.