Klukkan tæplega hálf fimm í nótt keyrði ökumaður í veg fyrir lögreglubifreið og inn á bílastæði í Hlíðunum. Bíllinn var númerslaus og var ökumaður með einn farþega í bílnum. Þeir fóru báðir úr bílnum og komst farþeginn undan. Ökumaðurinn var handtekinn grunaður um akstur undir áhrifum fíkniefna, ítrekaðan akstur sviptur ökuréttindum, vörslu fíkniefna og brot á lyfjalögum.
Klukkan rétt rúmlega átta í gærkvöldi hafði lögregla afskipti af öðrum manni í Hlíðunum sem var í mjög annarlegu ástandi. Hann var handtekinn sökum ástands og vistaður í fangageymslu. Við vistun fannst rafstuðbyssa hjá manninum og verður hann kærður fyrir brot á vopnalögum.
Lögreglan handtók mann á heimili sínu í Kópavogi þar sem hann er grunaður um framleiðslu fíkniefna og voru efni og búnaður haldlagt.
Klukkan rúmlega níu hafði lögreglan afskipti af manni í annarlegu ástandi sem svaf í bifreið í Grafarvoginum. Hann er grunaður um vörslu fíkniefna og voru kveikjuláslyklar bifreiðarinnar haldlagðir.
