Lögregla á höfuðborgarsvæðinu handtók mann í mjög annarlegu ástandi í Grafarvogi síðdegis í gær. Í dagbók lögreglu segir að tilkynningin hafi borist klukkan 17:20, en ítrekað var búið að hafa afskipti af manninum þar sem hann var að valda ónæði.
Maðurinn er einnig grunaður um þjófnað og var hann vistaður í fangageymslu , en einnig fundust fíkniefni hjá manninum.
Í dagbók lögreglu segir einnig frá því að um kvöldmatarleytið hafi svo tilkynnt um þriggja bíla árekstur í Hvalfjarðargöngunum líkt og greint var frá í gærkvöldi.
Þá stöðvaði lögregla bíl í miðborg Reykjavíkur upp úr klukkan 22 þar sem ökumaður er grunaður um akstur undir áhrifum áfengis og fíkniefna sem og vörslu fíkniefna.
Hvalfjarðargöngum var lokað tvisvar síðdegis með stuttu millibili vegna umferðaróhappa. Í fyrra skiptið voru þau lokuð í yfir klukkustund en í það seinna í 40 mínútur. Ökumenn fóru út úr bílum sínum til að kaupa ís af ísbílnum sem sat einnig fastur.
