Fyrstu laxarnir komnir úr Ytri Rangá

Karl Lúðvíksson skrifar 21. júní 2022 10:07

Stefán með 97 sm laxinn sem veiddist í gær í Ytri Rangá Harpa Hlín

Ytri Rangá opnaði í gær en töluverð spenna var búin að myndast því það var farið að sjást til laxa fyrir tveimur vikum síðan sem telst nokkuð snemmt fyrir Ytri.

Fyrsti laxinn kom á land við Borg en það er eitt af neðstu svæðunum í ánni. Það var Klaus Vander sem landaði honum en laxinn var 85 sm hrygna. Það var nokkuð líf yfir daginn, laxar sáust á Rangárflúðum, Ægissíðufossi og við Gunnigilsbreiðu. Það var líka verið að setja í stóra laxa en Stefán Sigurðsson annar af leigutökum Ytri Rangár hjá Iceland Outfitters landaði 97 sm hæng sem eins og myndin ber með sér kemur afskaplega vel haldin úr sjó.

Nú styttist hratt í að aðaltíminn í ánum renni upp en það verður að segjast að miðað við fréttir úr nokkrum ám er þetta bara ágætis byrjun.

Stangveiði